न्हूगु संविधानसभाया निर्वाचन प्रणाली हिलेगु ज्याप्रति अन्तरराष्ट्रिय आदिवासी महासंघया आपत्ति
न्हुगु संविधानसभाया निर्वाचन प्रणाली हिलेगु खँय् प्रमुख दलत दथुइ जूगु सहमति प्रति अन्तरराष्ट्रिय आदिवासी जनजाति महासंघ मंकाः संघर्ष समितिं आपत्ति व विरोध याःगु दु ।
न्हूगु व्यवस्था संविधानसभाया चुनावी प्रणालीइ समानुपातिक व्यवस्थायात हिइका जातिय पहिचान दुथ्याःगु संघिय राज्य संरचना पक्षधरतय्त निरुत्साहित यायेत, देय्या उत्पीडित व उपेक्षित पुचःतय्तं न्हूगु संविधानसभाय् प्रतिनिधित्व व सहभागिता म्हो यायेत व एकात्मकवादीतय्सं हान एक छत्र एकाधिकार ल्हाःतय् लाकीगु कुत जक खः धासें महासंघं विरोध याःगु दु ।
नापं महासंघं न्हूगु संविधानसभाया निर्वाचन प्रणालीइ ४० प्रतिशत प्रत्यक्ष व ६० प्रतिशत समानुपातिक निर्वाचनया व्यवस्था यथावत कायम यायेत नं माग याःगु दु ।
अथेहे प्रधानन्यायाधिशया अध्यक्षताय् चुनावी सरकार गठन यायेगु व न्हूगु संविधानसभाया निर्वाचन प्रणाली विषयस प्यंगु राजनीतिक शक्ति जक च्वना सहमति याःगु प्रति नं महासंघं घोर भर्सना याःगु दु ।
