हनुमानध्वाखाय् जुइगु महापरित्राण पाठ समारोह छगू चर्चा

लोकय् लोक कल्याण याय्गु हेतुं थीथीकथंया ज्याखँत जुयावयाच्वंगु दु । विना ज्यां सुयागु नं हित जुइमखु । उकिं शारीरिक एवं मानसिकरुपं सुखी जुइया नितिं मनुखं खानपानया लिसें धर्मकर्मया ज्याखँय् नं पलाः न्ह्याकेमाः । भौतिक खुसिया नितिं जक थौं यक्को मनूत ब्वाय् वनाच्वंगु अवस्था दु । थुज्वःगु अवस्थां जक समाज सुथां लाईमखुगुलिं सज्जन मनूतय्सं मानसिक सुखया नितिं इलय् व्यलय् धार्मिक ज्याखँत सामूहिकरुपं न्ह्याका वयाच्वंंगु दु । थुगु हे झ्वलय् थ्व हे २०६९साल फागुन १९ गते शनिवाः प्रथम ऐतिहासिक वृहत पवित्र महापरित्राण पाठ हनुमानध्वाखा प्रांगनय् न्ह्याकीगु जूगु दु । नेपाःया दिगो शान्तिया नापनापं मानव कल्याणकारी बुद्धशासनया निरन्तरता, समस्त सत्वप्राणीया सुखः शान्ति, कल्याणया नापं पर्यावरण शान्तिया नितिं गौरवमय भिक्षु महासंघपाखें थुगु महापरित्राण ज्याझ््वः जुइगु खः ।

भगवान बुद्ध नेपालय् बूगु खयां नं वसपोलया शिक्षायात प्रचार प्रसार थीथी ज्याझ्वः मार्फत व्यापकरुपं याय्गु ज्या धाःसा म्हो जक खनेदयाच्वंगु अवस्थाय् थुकथंया छगू ऐतिहासिक ज्यां नेपाःया गौरव हे विश्वया न्ह्योने धस्वाइगु निश्चित जूगु दु । नापं थुकीयात आम नेपाःमिपिन्सं बांलाक चिन्तन यानावन धाःसा मानसिक सुख प्राप्त याय्त थाकुइमखु । गुगुं नं ज्याझ्वःया लिच्वः सिमित ई तकया नितिं जक मजुुसे ताःई तक जुइकेया नितिं थीथी सुत्रत प्रयोग धाःसा बांलाक याना मवंसें मगाः । बुद्धं मानव कल्याणया नितिं गाक्कं हे लँपु क्यना बिज्यागु खयांनं उगु लँपुयात धाःसा झीसं बांलाक वाःचाय्का मच्वंगु थौंंया परिप्रेक्ष्यय् थुगु पवित्र महापरित्राणं गाक्कं हे वाःचाय्केकथंया ज्या याय्माःगु आवश्यकता महशुस याकीगु जूगु दु ।

सुंनं मनुखं सुख शान्तिया कामना म्हुतुं जक यानाः ज्यायात प्राथमिकता मबिया वनाच्वन धाःसा थुकि पूर्णता प्राप्त याइमख । उकिं ज्यां हे कामनायात साकार रुप बिइमाःगु थौंया आवश्यकता खः । उकिं न्हापांगु ऐतिहासिक वृहत पवित्र महापरित्राण पाठया ज्याझ्वः यक्को भक्तजनतय्गु परिश्रमं न्ह्याइगु खः । ताःहाकःगु ई तकया कठोर रुपं परिश्रम याना तिनि थुगु ज्यायात पूर्णता बिइफइगु खः । थुकथं स्वय्बलय् ग्वसाःखलःपिन्सं न्ह्याकूगु कुतःयात हरेक भक्तजनपिन्सं प्रशंसा याना थःम्हं नं छुं कठोर कुतः यानावन धाःसा ग्वसाः खलकं मनंतुंगु शान्ति कामना साकार जुइगु निश्चित दु । नेपालय् शान्ति कामनाया नितिं आपालं ज्याखँत जुइधुंकूगु अवस्था दुसां नं थौं तक नं बांलाक शान्तिं वास यानामच्वंगुया हुनिं छु खः । थ्व बडो चिन्तनया बिषय जुया सकल नेपाःमिया न्ह्योने दं वयाच्वंगु दु ।
थुगु खँयात बिचाः याना स्वय्बलय् खाली ग्वसाः खलकं जक शान्तिया कामना यानां मगागु जुयाच्वन धकाः सीकेफु । उकिं आः ग्वसाः खलःया लिसेलिसें समस्त नेपाःपिपिन्सं नं थःथःगु थासं शान्ति व सुखया नितिं मन, वचन व कर्मं ज्या न्ह्याका वनेमाःगु दु , थ्व हे दकले उत्तमगु व तःधंगु ज्या खः । गुगुं नं ज्यायात औपचारिक रुपं जक मस्वसे ह्रदयनिसें हे स्वयाः न्ह्याःवनेमाःगु आवश्यक जू । ज्यायात बांलाक प्राथमिकता बियावन धाःसा जक गुगुकथंया चाहना खः, उगु कथंया सफलता प्राप्त जुइगु निश्चित दु । उकिं मानव कल्याणया नितिं दुगु बुद्ध शिक्षायात हरेक मानवं बांलाक अध्ययन, मनन व चिन्तन याना वनेमाःगु दु । थ्व हे सफलताया त्वाथः नं खः धकाः वाःचाय्का न्ह्याःवनेमाःगु दु । न्ह्याःगु ज्याझ्वःया नं थःथःगु महत्व व उकिया उपलब्धि दयाच्वनि । उगु उपलब्धियात बांलाक कःघाना न्ह्याःवनेमाःगु धैगु हे ज्याझ्वःयात थःम्हं स्वागत यानागु सावित जूवनि । उकिं हनुमानध्वाखाय् न्ह्याकीगु ज्याझ्वःयात नं स्वागत याय्गु धैगु हे भगवान बुद्धया शिक्षायात स्वागत याय्गु खः ।