अन्तर्राष्ट्रिय मांभाय् दिवस हन
फेब्रुअरी २१ अन्तर्राष्ट्रिय मांभाय् दिवस थीथी ज्याझ्व: याना: हंगु दु। थुकिया लसताय् प्रज्ञा प्रतिष्ठान, कमलादीइ बुधबारंनिसें राष्ट्रिय मातृभाषा कविता महोत्सव न्ह्याःगु खःसा नेपालय् दुगु बंगलादेशी राजदूतावासय् भाषिक गोष्ठी नं जूगु खः ।
बंगलादेशी राजदूतावासया मिनिष्टर फर्हदूल इस्लामया उपस्थितिइ सुथय् बंगलादेशी राजदूतावास व नेपालभाषा परिषदया कुतलय् नेपालभाषापाखें पूर्ण वैद्य, प्रतिसरा सायमि व सुरेशकिरण मानन्धरं थ:थ:गु कविता ब्वना न्यंकादीगु खः ।
मेखे वर्ल्ड नेवाः अर्गनाइजेशनं मांभाय् दिवसया लसताय् छगू वक्तव्य पिथनाः भिंतुना देछाःगु दु । अर्गनाइजेशनया छ्याञ्जे व प्रवक्ता भाजु सुभाषराम प्रजापतिं ल्हाःचिं तयातःगु वक्तव्यय् देश लोकतन्त्रय् वयाः नं आम जनतां थुकिया अनुभूति यायेफुगु मदुगु व भाषिक समानता मदयाः शोषित व अल्पसंख्यक जनतात भाषिक अधिकारपाखें वञ्चित हे जुया च्वनेमाःगु अवस्था दु धयातःगु दु । 'शैक्षिक ख्यलय् मांभासं शिक्षाया पुलांगु मागयात पूवंकेत पलाः ल्व्हनेगु छखे तयाः लोकतन्त्रया न्हूगु शैक्षिक प्रणालीइ नं एसएलसीइ कम्प्यूटर विज्ञानया विकल्पय् जक मांभाय् विषय तया बिइगु ज्या थुकिया ज्वलन्त उदाहरण खः' वक्तव्यय् न्ह्यथना तःगु दु ।
