बन्दं जनजीवन प्रभावित थाय् थासय् तोडफोड
नेकपा–माओवादीं याःगु नेपाल बन्दं थौं देय्न्यंकया जनजीवन सुथंनिसें प्रभावित जूगु दु । माओवादीं जनयुद्धकालिन मुद्दा खारेजीया माग यानाः छुं दिं न्ह्यः हे नेपाल बन्दया इनाप याःगु खः । माओवादीं थौं नेपाल बन्द परिवर्तित सन्दर्भयात नापं लक्षित याःगु प्रष्ट याःगु दु ।
बहालवाला प्रधानन्यायधिशयात चुनावी सरकारया नेतृत्व बीगु सहमति मान्य मजुइगु न्ह्यःथना माओवादीं सरकार नीस्वनेगुलिइ वैदेशिक हस्तक्षेपया विरोध, राष्ट्रिय स्वाधिनता अःखः असंवैधानिक व निर्दलिय सरकारया विरोध, राजनीतिक दलतय्गु सहमतिइ राष्ट्रिय संयुक्त सरकार नीस्वनेगु लगायतया माग याःगु दु ।
बन्द इनापकर्तापिं सुथंनिसें हे स्वनिगः लगायत देय्न्यंकया सतकय् कुहांवःगु दु । स्वनिगःया चुक चुकय् बन्दकर्तातय्सं सुथंनिसें हे यातायात ठप्प याःगु दुसा बजाः, पसः नं बन्द याकाच्वंगु दु ।
सुथसिया खुताः इलंनिसें न्ह्याःगु बन्द सनिलया न्याताः ईतक्क कायम जुइगु उगु पार्टीं जानकारी ब्यूगु खः । बन्दया झ्वलय् प्रेस, एम्बुलेन्स, शव बाहन, दुरु क्वःबिइगु गाडी, कूटनीतिक नियोग, पर्यटक, मानव अधिकारवादी लिसे इहिपाया गाडीयात धाःसा पंगः मथनेगु जानकारी ब्यूगु खः । बन्द हड्तालय् ब्वति काःगु न्ह्यःथन प्रहरीं स्वनिगःया थीथी थासं माओवादी कार्यकर्तातय्त ज्वंगु दु ।
येँया जमःपाखें अखिल क्रान्तिकारीया केन्द्रीय दुजः राजन राई, जिल्ला दुजः विकास खनाल, रत्नपार्कपाखें माओवादी कार्यकर्ता विश्वनाथ खनाल व ग्वंगबुँपाखें रबि महर्जनयात ज्वंगु खः । जमः व रत्नपार्कपाखें ज्वंपिंत दरबार मार्ग व ग्वंगबुँपाखें ज्वंपिंत महाराजगञ्जय् तयातःगु जानकारी ब्यूगु खः ।
थ्वहे दथुइ स्नातक तह स्वंगूगु दँया विद्यार्थीतय्त परिक्षा हलतक्क चले याःगु चिचीधंगु सवारी साधनयात चले याके बीगु अखिल क्रान्तिकारीया मू छ्याञ्जे कमल शाहीं जानकारी बियादीगु खः । परिक्षा हलय् वनेगु व परिक्षा क्वचायेका छेँय् लिहांवयेगु अवधिइ परिचय पत्र लिसे प्रवेशपत्र दुपिं विद्यार्थीतय्त पंगः मथनेगु निर्णय जूगु शाहीं धयादीगु खः ।
बन्दकर्तातय्सं कान्तिपुर टेलिभिजनया गाडी व येँया न्हू बानेश्वरय् सगरमाथा टेलिभिजनया गाडी तोडफोड याःगु दु । प्रेसया गाडी दथुइ जूगु तोडफोडप्रति दुःख प्वंकुसें माओवादीं संयमतापूर्वक बन्द ताःलाकेत कार्यकर्तातय्त इनाप याःगु दु ।
बन्दया अवज्ञा याःगु न्ह्यःथना बन्दकर्तातय्सं थौं सुथय् चाबहिया गोपीकृष्ण हललिक्क बा. १ ज ८३१८ ल्याःया ट्याक्सी तोडफोड यानाब्यूगु खः ।
