समाजसेवी तीर्थधर तुलाधरया बिचाः मुँज्या

नेवाः भाषा, लिपि, धर्म, तजिलजि व समाजया अनन्यसेवीया कथं थःगु जीवन समर्पित यानाः सामाजिक ज्याय् तसकं दत्तचित्त जुया न्ह्यचिलादीम्ह तीर्थधर तुलाधरया बिचाः मुँज्या जुल । जनबहाः द्यः धलिं लुइगु मण्डपय् विशिष्ट व्यतित्वपिनिगु दथुइ शनिवाः उगु बिचाः मुँज्याः जूगु खः ।

थम्हं फूबलय् समाजया निंतिं छुं यानाः वनेमा धइगु भावनाया धनी एवं मिलनसार व्यतित्व तीर्थधर तुलाधरं जनबहाः, स्वय्म्भूया महामञ्जु्श्री लागा लगायत थीथी थासय् अतुलनीय योगदान यानादीगुलिं वय्कःया योगदानयात लुमंका न्ह्याकूगु बिचाः मुँज्याय् भिक्षु कौडण्यं मदुम्ह तुलाधरं यानादीगु ज्याया प्रशंसा यासें स्वांया उपमा बियादिल । वय्कलं मनूया गुण बारे नं चर्चा यानाः बिज्यात ।

उपस्थित आपालं व्यतित्वपिन्स भावुकं मदुम्ह तुलाधरया किपाय् स्वां देछाना श्रद्धाञ्जली प्वंकेगु ज्या नं जूगु उगु बिचाः मुँज्याय् नेपाल लिपि गुथीया नायः शरद कसां जनबाहाःया नासः द्यःछें व उगु छेंया क्वसं च्वंगु दबू संरक्षण यायेत भाजु तीर्थधरं म्हितादीगु भूमिकाया चिन्तनयात कयाः चर्चा यानादिल ।

थुकथं हे नेपाल लिपि गुथिया प्राज्ञ प्रतापमान शाक्यं मदुम्ह तुलाधरं नेपाल लिपिया विकास यायेत म्हितादीगु भूमिकाया बारे चर्चा यानादिल । नापं वय्कलं तीर्थधर तुलाधरं कुमारी माजुया खत दय्केत माःकथंया आर्थिक तिवः बिया खत दय्केगु ज्या सुथां लाकादीगु खँ न्ह्योथनादिल ।

थुकथं हे बिचाः मुँज्याय् थःगु बिचाः प्वंकेगु झ्वलय् नेवाः न्ह्यलुवाः पद्मरत्न तुलाधरं तसकं हे भाव विभार जुया तीर्थधर तुलाधरया भावनायात लुमंका वय्कःया योगदानया चर्चा यानाः दिलसा पूर्वमन्त्री हिसिला यमिं तीर्थधर धात्थेंया तीर्थ हे खः धयादिल । वय्कःया भावना तसकं तःधं धासें थुकथंया व्यतित्वयात लुमंकेगु हे समाज उत्थानया ज्याय् तिवः बिइगु खः धयादिल ।

मुँज्याय् जनकवि दुर्गालाल श्रेष्ठं नं मदुम्ह तुलाधरया सामाजिक ज्याया चर्चा यानादीगु उगु मुँज्याय् सभापतिया थासं निलकाजी शाक्यं तसकं भावुक जुया आः झीसं तीर्थधरं यानाः ल्यँ दनिगु ज्या पूवंकेगु हे वय्कःयात धात्थेंया श्रद्धाञ्जली प्वंकागु सावित जूवनिगुलिं उकथं यानाः वनेमाःगु खँय् बः बियादिल ।

नेपाल लिपि गुथि, श्री आर्यावलोकितेश्वर (सर्वसंघ जनबाहाः), नासः द्यःछेँ व दबू संरक्षण समिति जनबाहाःया ग्वसालय् जूगु उगु ज्याझ्वः पवित्र कसां न्ह्याकूगु खःसा उगु ज्याझ्वस उपस्थित सकलसिनं तसकं हे भाव विभार जुया वक्तातय्गु खँ न्यनादीगु खः ।