देय् दबूया पश्चिमाञ्चल सहलह मुँज्या क्वचाल

नेवाः देय् दबूया पश्चिमाञ्चल स्तरिय सहलह मुँज्या तनहुँया थर्पु बजारय् शनिवाः क्वचाःगु दु ।

ज्याझ्वःलय् जिल्लाया प्रतिनिधितय्सं देय् दबूया वंगु खुक्वःगु महाधिवेशन, महाधिवेशनया व्यवस्थापन, विधानयात कया सहलह यायेगु ज्या जुगू खःसा प्रतिनिधितय्सं तयादिगु न्ह्यसः व जिज्ञासाया लिसः केन्द्रीय समितिया पदाधिकारीतय्सं बिइगु ज्या जुगू खः ।

ज्याझ्वःलय् न्वचू तयेगु झ्वलय् मूपाहाँ कथं झायादिम्ह नेवाः देय् दबूया नायः भाजु नरेश ताम्राकारं वइगु ने.स. ११३३ सिलाथ्वः त्रियोदसि कुन्हु सूदुर पश्चिमाञ्चल, पुन्हि कुन्हु मध्यपश्चिमातञ्चल व सिलागाः त्रियोदसि कुन्हु पुर्वाञ्चल लागाःया सहलह मुँज्या जुइगु व सकसिया सुझाव कथं महाधिवेशन यायेगु बचं बियादिगु खः ।

उगु ज्याझ्वःलय् नेवाः देय् दबूया ग्वाहालिइ तनहुँ नेवाः पुचः दमौलिइ न्ह्याकाच्वंगु धिमे बाजं प्रशिक्षार्थीकतय्सं सँस्कृतिक ब्वः ज्या यानादिगु खः धाःसा जिल्लाया प्रतिनिधितय्सं जिल्ला जुयाच्वंगु ज्याझ्वः न्ह्यब्वयादिगु खः ।

मुपाहाँ व विशेष पाहाँ प्रकाश पालिखें त्वाःदेवाय् मत च्याकाः उलेज्या यानादिगु उगु ज्याझ्वः छ्याञ्जे भाजु माइलाबाबु द्योलां न्ह्याकादिइगु खः । ज्याझ्वलय् नेवाः देय् दबू तनहुँ जिल्ला समितिया नायः शंकर नारायण श्रेष्ट, थर्पु नेवाः पुचःया नायः भाजु राम मल्ल व बुद्धिजिबी राजेन्द्र मल्लं भिंन्तुना न्वचू बिइयादिगु खःसा पश्चिमाञ्चल न्वकू भाजु विष्णु प्रसाद श्रेष्ठया नायःसुइ न्ह्याःगु ख ।

ज्याझ्वःलय् विजय प्रकाश तण्डुकार, दांभरि विजय रत्न बज्राचार्य, केन्द्रीय दुजः यशोदा श्रेष्ठ, सुदर्शना दर्शनधारी, पुर्णकृष्ण श्रेष्टपिंनिगु नं ब्वति दुगू खः ।

More Stories Like this