क्यानेडियन नेवाः गुथि पाखें अन्वेषक छत्रबहादुर कायस्थयात ग्वहालि
नेपालभाषा कला संस्कृतिया अन्वेषक नापं नेपालभाषा मंका खलः यलया संस्थापक नायः छत्रबहादुर कायस्थया जहान मोतीलक्ष्मी कायस्थ मत्येवं मदुगु दुःख लुमंका क्यानेडियन नेवाः गुथिपाखें वय्कःयात ग्वहालि यात ।
ने.सं.११३३ पोहेलागा एकादशी खुन्हु यलया अक्षेश्वर महाविहारय् क्यानेडियन नेवाः गुथिया प्रतिनीधि महेशप्रसाद प्रधानपाखें ग्वहालि मुक्कं १०२,३४२।- तका कायस्थयात लःल्हानादीगु खः ।
उगु इलय् नेवाः पत्रकार राष्ट्रिय दबूया केन्द्रीय नायः श्रीकृष्ण महर्जनं वयकःया योगदानया कदरयासें थुगु ग्वहालि लःल्हायेगु ज्याझ्वः लिपा वय्कः झन जिम्मेवारी पूर्वक सकृय जुयादीगु आशा प्वंकादील । ज्याझ्वलय् क्यानेडियन नेवाः गुथिया प्रतिनीधि महेशप्रसाद प्रधानं झी नेवाःत लसताय् जक मखु दुःखय् नं मुना ग्वहालिया कालबिल यायेगु संस्कार दपिं जूगुलिं झीसं थुकीयात निरन्तरता बिइमाःगु धयादिल ।
नुगः खँ प्वंकेगु झ्वलय् अन्वेषक कायस्थं थीथी ख्यलं वःगु ग्वहालिपाखें थः जहानया वासःयाकेगु झ्वलय् जूगु सकतां खर्च पुलेधुंका ल्यनिगु ध्यबा थथेहे दुःखया इलय् ग्वहालि यायेगु ताःतया छगू कोष दय्काः वनेगु बिचाः प्वंकादिल ।
ज्याझ्वलय् पत्रकार दबूया छ्याञ्जे सुरजवीर बज्राचार्यं लसकुस यानादीगु खः । पत्रकार राष्ट्रिय दबू यलया नायः सुरज ब्यञ्जनकारजुया नायसुइ जूगु ज्याझ्वलयात पत्रकार दबूया दुजः राजेन्द्र शाक्यं न्ह्याकादीगु खः ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
