बंगलादेशी राजदूतावासय् नेपालभाषाया कविपिंसं कविता पाठ याइगु
राजेन्द्र शाक्य
नेपालभाषा परिषदया कुतलय् वइगु मातृभाषा दिवस खुन्हु बंगलादेशी राजदूतावासय् नेपालभाषाया थीथी कविपिंसं कविता पाठ याइगु जूगु दु ।
दँयदँसं फेब्रुअरी २१ तारिखय् हनीगु अन्तर्राष्ट्रिय मातृभाषा दिवसया लसताय् नेपालभाषाया थीथी च्वमिपिंसं बंगलादेशी राजदूतावासय् रचना पाठ यायगु ज्याझ्व: क्व:ज्यूगु नेपालभाषा परिषदया छ्यांजे नवीन चित्रकारं जानकारी बियादिल।
म्हिग: बंगलादेशी राजदूतावासया मिनिष्टर फर्हदूल इस्लामलिसे जूगु सहलह लिपा मातृभाषा दिवस खुन्हुया ज्याझ्व: क्व:ज्यूगु चित्रकारं कनादिल। क्व:ज्यूगु ज्याझ्व:कथं वइगु फागुन १० गते नांजा:पिं साहित्यकार पूर्ण वैद्य, प्रतिसरा सायमि, सुरेशकिरण मानन्धर, शशिकला मानन्धरपिंसं थ:थ:गु रचना ब्वनान्यंकादीत्यंगु दु ।
सुथय् झिता: इलय् जुइगु ज्याझ्वलय् मातृभाषा सम्बन्धि हे अन्तर्क्रियाय् पुष्परत्न तुलाधर व नवीन चित्रकारं नेपालभाषाया प्रतिनिधित्व यासें थ:थ:गु बिचा: तयादीत्यंगु दु।
थ्वहे झ्वलय् वइगु सोमवाः नेपालभाषा केन्द्रीय विभाग, यलध्वाखाया ब्वँमित शैक्षिक भ्रमणया लागिं नेपालभाषा परिषदय् वयत्यंगु दु । बिभागय् नेपालभाषा कया: ब्वनाच्वंपिं ब्वँमित नेपालभाषा परिषदयात साहित्य मन्दिर कथं कया: शैक्षिक भ्रमणय् वयत्यंगु छ्यांजे चित्रकारं जानकारी बियादिल ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
