रात्री क्लबय् मि च्यानाः सच्छि स्वयां अप्वः मनूत सित

ब्राजिलया दक्षिणी शहर सात मारियाय् च्वंगु छगू रात्री क्लबय् मिच्यानाः १३० म्ह मनूत सीगु दु । रात्रीक्लबय् सांगितिक पुचलं आतिशबाजी यानाः प्रदर्शन याःगु छुं ई लिपा हे मि च्याःगु सरकारी अधिकारीतय्सं न्ह्यथंगु दु ।

रियो ग्राण्डी डु सिओल राज्यया शान्ता मारिया शहरय् च्वंगु किस नांया रात्री क्लबय् उगु घटना जूगु खः । निद्वः मनूत च्वनेगु क्षमता दुगु उगु रात्री क्लब शनिवाः चान्हय् पूवंक हे जाःगु खः ।

उगु क्लबं पिहांवनेगु लुखा छगू हे जक जूगुलिं नं मनूत पिहांवयेमफूगु खःसा थ्वहे कारणं सीपिनिगु ल्याः अझ थहां वनेफूगु धाःगु दु । मि पूवंक हे नियन्त्रणय् वयेधुंकूगु नं बिबिसीं न्ह्यथंगु दु ।

प्रमुख अग्नि नियन्त्रक गाइदो दि मेलोया कथं अग्नि नियन्त्रकतय्सं पःखाः तछ्यानाः दुहांवंसे मि स्याःगु खः ।

मि च्याःगु कारणं घाःपाः जूपिं सलंसः मनूतय्त वासः यायेगु लागि अस्पताल यंकूगु बिबिसीं न्ह्यथंगु दु ।

More Stories Like this