पुलिस सुपरलिगय् च्वनेत ताःलात

येँय् न्ह्यानाच्वंगु शहिद स्मारक ए डिभिजन लिग फुटबलय् नेपाल पुलिस क्लब शीर्ष च्यागूगु थासय् च्वनेत ताःलाःगु दु ।

येँया दशरथ रंगशालाय विहिवाः जूगु कासाय् यलया जावलाखेल युथ क्लबयात १ गू गोलं बुकाः शीर्ष च्यागुलिइ थाय् दयेकूगु खः । थुगु कासा त्याकाः २३ गू ल्याः काःगु पुलिसं उलि हे ल्याः कयातःगु सरस्वती युवा क्लबयात हेड टु हेडया लिधंसाय् ९ गूगु थासय् घ्वानाछ्वःगु दु ।

पुलिसयात सुपर लिगय् थ्यंकेत ७३ गू मिनेटय् चेतन घिमिरें याःगु गोल हे पर्याप्त जूगु खः । कासाय् जावलाखेलया विदेशी कासामि जुमा बेन्लीं ८९ गू मिनेटय् वन भर्सेज वनया अवस्थाय् गोल याये मफयेवं जावलाखेल बराबरी यायेगु ह्वःताः छखे लाःगु खः । जावलाखेल धाःसा १४ गू ल्याः कयाः लिग धलखय् १३ गूगु थासय् च्वनाः ए डिभिजन लिक क्वचायेकूगु दु ।

More Stories Like this