उपाधि रक्षाया लागि अजारेन्कां ली ना लिसे धेंधेंबल्ला याइगु

साविक विजेता भिक्टोरिया अजारेन्का व चीनया ली ना अष्ट्रेलियन ओपन टेनिसया उपाधिया लागि धेंधेंबल्ला याइगु जूगु दु ।

विश्व नं १ कासामि अजारेन्कां अमेरिकी टिनएजर कासामि स्लोअने स्टेफनाया ६-१ व ६-४ या सेटं बुकूगु खः । १५ क्वः तकया ग्राण्डस्लाम टेनिस च्याम्पियन सेरेना विलियम्सयात स्टेफनं क्वाटरफाइनलय् बुकाः सेमिफाइनल थ्यंम्ह स्टेफन बेलारुसी कासामि अजारेन्काया न्ह्यःने खास हे चमत्कार क्यने मफूगु खः ।

अथेहे निगूगु सेमिफाइनल कासाय् विश्व नं २ कासामि मारिया सारापोभा पराजित जूगु दु । सेमीफाइनल तक थ्यनेत मुक्कं गुंगु जक कासा बूम्ह रुसी कासामि सारापोभा खुगूगु बरियताया ली ना लिसे ६-२ व ६-२ या सेटं बूगु खः ।

मिजंतय्गु कासाय् साविक विजेता नोभाक जोकोभिक फाइनलय् थ्यंगु दु । सर्वियन कासामि जोकोभिकं सेमीफाइनलय् डेभिड फेररयात मुक्कं १ घौ व २९ गू मिनटय् ६२, ६२ व ६१ या तप्यंक सेटं बुकूगु खः । आः उपाधिया रक्षा यायेगु लागि स्वीस कासामि रोजर फेडरर व ब्रिटीस कासामि एण्डी मुर्रे दथुइ जुइगु कासाया विजेतालिसे म्हिती ।

More Stories Like this