प्यम्ह शहीदया लुमन्तिइ बुधवाःनिसें शहीद सप्ताह न्ह्यात

नेपाःमि जनतायात जहानिया“ राणा शासनया पञ्जापाखें मुक्त यायेत थःगु जीवन आहुती ब्यूपिं शहीदया लुमन्तिइ दँय्दसँथें थुगु दँय् नं थनिनिसें शहीद सप्ताह सुरु याःगु दु । सहिद सप्ताहया न्हापांगु दिं बुधवाः शहीद शुक्रराज शास्त्रीया टेकुइ च्वंगु शालिकय् स्वांमा क्वखायेका शहीद सप्ताह सुरु याःगु खः । शहीद सप्ताहया न्हापांगु दिं येँ महानगरपालिकाया कार्यकारी अधिकृत केदार बहादुर अधिकारीं शालिकय् स्वांमां क्वखायेका उलेज्या यानादिल । महानगरपालिकां वीर शहिदप्रति सम्मान कथं वाःन्यंकं थीथी ज्याझ्वः ग्वसाःग्वःगु दु । प्रजातन्त्र प्राप्तीया नितिं विसं. १९९७ सालय् दकले न्हापां शास्त्रीयात मृत्युदण्ड ब्यूगु खः । न्हेछदँ न्ह्यः अथेधयागु माघ १० गते टेकुको खरिया सिमाय् यःखाना राणा शासकतय्सं शास्त्रीयात स्याःगु खः । शास्त्रीयात यःखाना मृत्युदण्ड ब्यूगु उगु खरीया सिमाय् बुधवाः येँ महानगरपालीकाया कार्यकारी निर्देशक केदारवहादुर अधिकारी नापं कर्मचारी व सर्वसाधारण जनतां नं शहिद शुक्रराजया किपातय् स्वांमां क्वखायेकल । शास्त्रीयात यःखाना मृत्युदण्ड ब्यूगु टेकुइ च्वंगु खरीया सिमा थौं तक नं दनि । तात्कालीन बन्द व्यवस्थाय् जनता व देय्यात राणाशासनयसा पञ्जां मुक्त यायेगु झ्वलय् समाजिक सुधार पाखें अभियान न्ह्याकादीम्ह शास्त्री नापं धर्मभक्त माथेमा, दशरथ चन्द व गंगालाल श्रेष्ठयात राणा शासकं मृत्युदण्ड ब्यूगु खः ।

News Location: