इतुंवाः निःशुल्क क्लिनिकं च्यादँ बुदिं हन
श्री केशचन्द्र महाविहार संरक्षण समाजपाखें न्ह्याकाच्वंगु इतुंवाः निःशुल्क क्लिनिक न्हय्दँ फुना च्यादँ क्यंगु लसताय् क्वाःपाद्यःथाय् बुद्ध पूजा यासें क्लिनिकयात तिवः बिया वया च्वनादीपिन्त माघ ६ गते शनिवाः इतुंबहालय् हनेज्या याःगु दु ।
चक्रेश्वरी हेमपूर्णानन्द बज्राचार्य मूपाहां जुयाबिज्यागु व क्लिनिकया संयोजक उत्तम शाक्यया सभापतित्वय् न्ह्याःगु उगु ज्याझ्वःस डा. प्रणवमान कर्माचार्य, डा. सुमिस्ती शाक्य, नर्स मोनिका शाक्य व पत्रकार सुगत रत्न सिन्दुराकारजुपिन्त समाजया अध्यक्ष क्या. चन्द्रबहादुर शाक्यं खादागा क्वखाय्कू खःसा वय्कपिंत हनापौ नं बिउगु खः ।
सम्मानित व्यतित्वपिंसं थःथःगु नुगः खँ नं प्वंकूगु खःसा डा. योगेन्द्रमान शाक्य व डा. उर्मिला शाक्यपिंसं स्वास्थ्य सम्वन्धि खँ कनादीगु खः । उगु ज्याझ्वःस इतुंबाःया थाय्पाजुपिं व सर्वसंघया उपस्थिति दुगु खः । मूपाहां चक्रेश्वरी एवं संघ थकालीजुपाखें त्वादेवाः च्याकाः उलेज्या याना न्ह्याःगु उगु ज्याझ्वःस क्लिनिकया पदाधिकारी केशवमान शाक्यं लसकुस यानादीगु खःसा मेम्ह पदाधिकारी सुरेश शाक्यं वार्षिक ल्याःचाः न्ह्यब्वयादीगु खः ।
