किपूलि नेवाः एकता दिवस तःजिक हन

नेवाःतय्सं जनस्तरं नेवाः स्वायत्त राज्य घोषणा याःगु दिं लुमंकाः किपूया नगाँ दोपातय् स्वक्वःगु नेवाः दिवस हन । नेवाः स्वायत्त राज्य मंकाः परिषद किपूया संयोजन व नेवाः स्वायत्त राज्य मंकाः संघर्ष समितिया ग्वसालय् जूगु ज्याझ्वःलय् प्रमुख राजनीतिक दलया नेतातय्सं नुगः खँ प्वंकूगु खः ।

संघर्ष समिति नायः गजेन्द्र मानन्धरया सभापतित्वय् जूगु ज्याझ्वलय् एनेकपा (माओवादी)या नायः पुष्पकमल दाहाल 'प्रचण्डं' उत्पिडित जनतया अधिकारया निंतिं नेवाः समुदायं न्ह्यावलें अग्रणी भूमिका म्हितुगु धयादिसें पहिचान व अधिकार सुनिश्चित मजुतले दबाव मूलक आन्दोलन न्ह्याकातुं च्वनेमाःगु धयादिल ।

नेपाः राष्ट्रिय पार्टीया नायः नापं विज्ञान व वातावरण मन्त्री डा. केशवमान शाक्यं थःगु अधिकार सुनिश्चित यायेगु निंतिं व प्रतिगामितय्त खबदारी यायेगु निंतिं झीसं नेवाः एकता दिवस हनाच्वनागु न्ह्यथनादिल ।

संघीय समाजवादी पार्टीया नायः अशोक राईं पहिचान सहितया संघीयता व संघीयता सहितया संविधान जनताया नुगःनिसें थ्वयाच्वंगु माग जूगुलिं थुगु माग अवश्य पूवनीगु धयादिसें संघीय समाजवादी पार्टी अझ नं संविधानसभा पुनर्स्थापना यानाः संवैधानिक लँपुपाखें राजनीतिक सहमति मालेगु पक्षय् दुगु धयादिल ।

नेपाली कांग्रेसया केन्द्रीय दुजः नरहरि आचार्यं न्हूगु संविधानय् पहिचान दुगु हे संघीयता दइगु धयादिसें तर अज्याःगु संघीयता लोकतान्त्रिक मान्यता कथं जुइगु धयादिल । वय्कलं संघीयता धइगु फुक्कसित सम्मानता बिइत जूगुलिं उकिं सुयातं पक्षपात यायेमजिउगु धयादिल ।

नेवाः स्वायत्त राज्य मंकाः परिषद किपूया पञ्चलाल महर्जनं लसकुस यानादीगु ज्याझ्वलय् नेकपा (एमाले)या जीवनराम श्रेष्ठं नं नुगः खँ प्वंकादीगु खःसा नेकपा–माओवादीया नायः मोहन वैद्य किरणं छ्वयाहःगु भिंतुना पौ ब्वनाः न्यंकूगु खः ।

ज्याझ्वः सुरु जुइ न्ह्यः पिहांवःगु सांस्कृतिक जुलुसं किपू नगर परिक्रमा याःगु खः ।

More Stories Like this