भाषण यानाच्वंगु इलय् नेतायात गोली

बुल्गेरियाया विपक्षी पार्टी "मुभमेन्ट फर राइट्स एण्ड फ्रिडम"या नेता अहमद डोगन असाधारण हत्यापाखें बल्लबल्ल म्वायेत ताःलाःगु दु ।

बुल्गेरियाया राजधानी सोफियाय् न्ह्यानाच्वंगु लोकतन्त्र व अधिकारया खँय् गरमागरम भाषण जुयाच्वंगु इलय् छम्ह ल्याय्म्ह वयाः नेता डोगनया न्हकुइ पेस्टोल दिकूगु खः । पेस्टोल दिकूगु जक मखु, ट्रिगर तकं क्वत्यःगु खः, तर पड्रके मजू । नेता डोगन वयात झम्टे यात व निशाना मखुथासय् लाःगुलिं म्वायेत ताःलाःगु खः । ल्याय्म्हेस्यां निक्वःखुसी कयेके न्ह्यः सुरक्षा गार्ड व ब्वतिकयाच्वंपिन्सं बन्दुकधारीयात बँय् क्वथलेधुंकल ।

प्रतिनीधि जुयाः सम्मेलनय् ब्वति काःवःम्ह २५ दँया ल्याय्म्हं डोगन भाषण यानाच्वंगु इलय् मञ्चय् थहांवयाः बन्दुकं ताकेयाःगु खः । उम्ह ल्याय्म्हपाखें निपु चक्कु तकं बरामद जूगु प्रहरीं न्ह्यथंगु दु । उम्हेसित नियन्त्रणय् कायेगु झ्वलय् तसकं दाःगु खः । लिपा पुलिसं हि बाःवयाच्वंगु अवस्थाय् नियन्त्रणय् कयाः सम्मेलन जूगु थासं पिने हःगु खः ।

More Stories Like this