फ्रेण्डस् पाखें मध्यपुर पराजित, संकटा व बाँसबारीया कासा बराबरीइ

येँ न्ह्यानाच्वंगु शहिद स्मारक ए डिभिजन लिग फुटबलय् फ्रेण्डस् क्लबं थिमिया मध्यपुर युथ एशोसियसनयात बुकूगु दुसा संकटा रेलिगेशनय् लानाच्वंगु बाँसबारी क्लबलिसे ल्याः इनाकायेत बाध्य जूगु दु ।

येँया दशरथ रंगशालाय् जूगु मंगलवाःया न्हापांगु कासाय् यलया फ्रेण्डस् क्लबं मध्यपुरयात निगू गोलं बुकूगु खः । उगु कासाय् फ्रेण्डस्या लागि ५१ गू मिनेटय् विदेशी कासामि डोजोकं गोल याःगु खःसा ८१ गू मिनेटय् जगजीत श्रेष्ठं गोलयानाः क्लबया लागि विजय सुनिश्चित याःगु खः । थुगु कासा त्यायेवं फ्रेण्डस् १८ गू ल्याः कयाः ८ गूगु थासय् थहांवंगु दुसा मध्यपुर १० गू ल्याः लिसें रेलिगेशन लागाय् लानाच्वंगु दु ।

अथेहे मंगलवाः हे जूगु मेगु कासाय् संकटा रेलिगेशन लागाय् लानाच्वंगु बाँसबारी लिसे बराबरी कासा म्हितूगु दु । लिग धलखय् अन्तिम निगूगु थासय् लानाच्वंगु बाँसबारीया विरुद्ध ६६ गू मिनेटय् साजन श्रेष्ठं गोल याःगु खः । तर कासा क्वचायेत निगू मिनेट ल्यं दनीगु इलय् बाँसबारीया लागि श्यामबाबुं गोल यासें कासा बराबरीइ हःगु खः । थुगु कासा बराबरी लिपा संकटा ९ गूगु थासय् लानाच्वंगु दुसा बाँसबारी १५ गूगु थासय् लानाच्वंगु दु ।

More Stories Like this