लगातार प्यक्वःखुसीइ मेस्सी सर्वश्रेष्ठ फुटबल कासामि

बार्सिलोनाया अर्जेन्टिनी स्टार लिओनल मेस्सीं लगातार प्यक्वःखुसी दक्कलय् बांलाःम्ह फुटबल कासामि जूगु दु ।

मेस्सीं फिफाया दक्कलय् बांलाःम्ह कासामिया सिरपाः "बलोन डि ओर २०१२" या उपाधि त्याकूगु खः । थःगु हे क्लब बार्सिलोनया स्पेनिस कासामि आन्द्रेइ इनिष्टा व रियल मेड्रिडया पोर्चुगिज कासामि क्रिष्टियानो रोनाल्डोयात लिउने लाकाः उगु उपाधि त्याकूगु खः ।

फुटबल पत्रकार, राष्ट्रिय प्रशिक्षक, कप्तान व स्वम्ह दावेदारं याःगु मतदानय् मेस्सीं ४१.६ प्रतिशत मत काःगु खःसा रोनाल्डों २३.६८ व इनिष्टां १०.९१ प्रतिशत मत काःगु खः ।
लगातार प्यक्वःतक "फिफा प्लेयर अफ दि इयर" उपाधिपाखें सम्मानित जूम्ह मेस्सी न्हापांम्ह कासामि नं जूगु दु । थगुने मेस्सीं युइएफएया वर्तमान नायः नापं जर्मनीया मिचेल प्लाटिनीया कीर्तिमानलिसे बराबरी याःगु खः ।
स्वीट्जरल्याण्डया जुरिचया सोमवाः चान्हय् जूगु ज्याझ्वलय् "बलोन डि ओर २०१२" त्याकूसें मेस्सीं थःत अविश्वसनीय जूगु व लगातार प्यक्वःखुसी उपाधि त्याकेगु धइगु तःधंगु उपलब्धि जूगु प्रतिक्रिया बिउगु दु ।

मेस्सीं जर्मनीया गर्ड मुलरया नामय् च्वंगु छगू क्यालेण्डर वर्षय् दक्कलय् अप्वः गोलया पीदँ पुलांगु कीर्तिमान त्वाःथःगु खः । २५ दँ दुम्ह मेस्सीं सन् २०१२ स ९१ गू गोल याःगु खः ।

More Stories Like this