मच्छिन्द्र शहिद स्मारक लिगया निगूगु थासय्

येँय् न्ह्यानाच्वंगु शहिद स्मारक ए डिभिजन लिग फुटबलया लिग धलखय् निगूगु थासय् थहांवंगु दु ।

मंगलवाः जूगु कासाय् मच्छिन्द्र क्लबं संकटा क्लबयात निगू गोलं बुकाः लिग धलखय् निगूगु थासय् थहांवंगु खः । थुगु कासा त्यायेवं मच्छिन्द्र १० गू कासापाखें २३ गू ल्याः थ्यंगु दुसा लिग लिडर थ्रीस्टार क्लबया उलिहे कासापाखें २५ गू ल्याः थ्यनाच्वंगु दु । स्वंगूगु थासय् लानाच्वंगु मनांगया २१ गू ल्याः दु ।

येँया दशरथ रंगशालाय् जूग उगु कासाय् ४५ गू मिनेटय् कर्ण लिम्बुया गोलपाखें मच्छिन्द्र न्ह्यःने लाःगु खः । न्हापांगु हाफय् छगू गोलं न्ह्यःने लाःगु मच्छिन्द्रया लागि ५५ गू मिनेटय् बिशाल राइ एं गोल यानाः अग्रता निदुगं याःगु खः । लिपा मच्छिन्द्रं गोल यायेगु छुं छुं ह्वःताः छ्यलेमफयेवं थप गोल मजुल ।

अथेहे मंगलवाः हे जूगु मेगू कासाय् सरस्वति क्लबं मध्यपुर युथ एशोसियसनयात निगू हे गोलं बुकल । कासाया २७ गू मिनेटय् यानाः इलियासया गोलपाखें सरस्वति न्ह्यःने लाःगु खःसा निगूगु हाफया ६० गू मिनेटय् इलियासं हे मेगू गोल याःगु खः ।

थुगु कासा त्यायेवं सरस्वति १० गू कासापाखें ११ गू ल्याः कयाः ११ गूगु थासय् थहांवंगु दु । मध्यपुर युथ एशोसियसन धाःसा रेलिगेशन लागाय् हे लानाच्वंगु दु ।

More Stories Like this