आरसीटीया लागि आर्मी पंगः जुल

उपाधिया होडय् वनाच्वंगु रानीपोखरी कर्नर टीम आरसीटीयात आर्मीं बुकूगु दु ।

शहिद स्मारक ए डिभिजन लिग फुटबलय् शनिवाः जूगु कासाय् आर्मीं आरसीटीयात छगूया विरुद्ध निगू गोलं बुकूगु खः । थुगु कासा त्यायेवं आर्मी लीग तालिकाया न्यागूगु थासय् थहांवंगु दु ।

शनिवाः जूगु कासाय् आर्मी ४९ गू मिनेटय् भरत खवासया गोलपाखें न्ह्यःने लाःगु खः । न्हापांगु हाफय् छगू गोलं न्ह्यःने लानाच्वंगु आर्मी विरुद्ध ७८ गू मिनेटय् आरसीटीया ओलाओलें गोल याःगु खः । थ्वया लिपा आरसीटिया ओलाओले निक्वःखुसी म्हासूगु कार्ड नयाः पिहांवंगु खःसा उकिया छुं मिनेत लिपा हे आर्मीया युद्ध शाही ह्याउँगु कार्ड नसें कासाख्यलं पिहांवन । कासाया अन्तय् आर्मी व आरसीटी निगुलिं झिम्ह झिम्ह कासामी सीमित जूवंगु खःसा कासाया अन्तय् भरत खवासं आर्मीया लागि गोल यायेवं कासा आर्मीया पक्षय् वंगु खः ।

थुगु कासा बुइवं आरसीटी २० गू ल्याःया लिसें लिग धलखय् निगूगु थासय् यथावत जूगु दु । छगू कासा म्हो म्हितूगु थ्रीस्टार क्लब २२ गू ल्याःया नापं शीर्ष थासय् लानाच्वंगु दु ।

More Stories Like this