साविक विजेता पुलिसयात एनआरटीं बराबरी पनाबिल

येँ न्ह्यानाच्वंगु शहिद स्मारक ए डिजिभज लिग फुटबल अन्तगरत शनिवाः जूगु कासाय् न्यूरोड टिम एनआरटीं साविक विजेता नेपाल पुलिस क्लबयात बराबरी पनाबिउगु दु ।

दशरथ रंगशालाय् जूगु उगु कासाय् निखेरं छगू छगू गोल जूगु खः । कासाय् एनआरटीं १० गूगु मिनेटय् सुलेमानया गोलपाखं अग्रता काःगु खः । तर ८ गू मिनेट लिपा हे पुलिसया लागि सुमन सुवेदीं गोलयानाः कासा बराबरी हःगु खः । कासाय् निगुलिं पक्षं बाबांलाःगु अवसरत छ्यलेमफूगु खः । लिपा निखेरं छगू हे गोल यायेमफयेवं कासा बराबरीइ क्वचाःगु खः ।

थौंया कासा बराबरी म्हितूगु एनआरटीया १६ गू ल्याः कयाः ल्याः धलखय् न्यागूगु थासय् थहांवंगु दु । उलि हे ल्याः काःगु संकटा क्लब गोल अन्तरया आधारं ६ गूगु थासय् लाःवन । अथेहे साविक विजेता पुलिस १३ गू ल्याः लिसें ८ गूगु थासय् लानाच्वंगु दु ।

More Stories Like this