मनांगया अपराजित यात्रा क्वचाल

येँय् न्ह्यानाच्वंगु शहिद स्मारक ए डिभिजन लिग फुटबलय् मनांग मस्र्यांदी क्लबया अपराजित यात्रा क्वचाल ।

येँया दशरथ रंगशालाय् शुक्रवाः जूगु कासाय् मनांग मच्छिन्द्र क्लबपाखें १ गूया विरुद्ध २ गू गोलं बूगु खः । मनांग थौंया कासा बुइवं न्ह्यानाच्वंगु लिगय् अपराजित जुयाच्वंगु टिम नं क्वचाःगु दु । थुगु कासा बुइवं लिग तालिकाय् निगूगु थासय् थहांवनेगु ह्वःताः नं त्वःफिकूगु दु ।

शुक्रवाः जूगु कासाय् २२ गू मिनेटय् मेविल एटेफनं गोल यासें मनांगयात न्ह्यःने लाकूगु खः। न्हापांगु हाफय् छगू गोलं लिउने लाःगु मच्छिन्द्रया लागि कर्ण लिम्बुं ६२ गू मिनेटय् गोल यासें कासा बराबरीइ हःगु खः । थ्वहे झ्वलय् कासाया ८६ गू मिनेटय् विशाल राई ए गोल यासें मच्छिन्द्रयात २-१ गोलं न्ह्यःने लाकल । लिपा निखेरं छगू हे गोल मजुइवं मच्छिन्द्र कासा थःगु पक्षय् लाकूगु खः ।

अथेहे शुक्रवाः जूगु मेगु कासाय् संकटा क्लबं मध्यपुर युथ एशोसियसनयात छगू गोलं बुकेत ताःलाःगु दु । उगु कासाय् ७४ गू मिनेटय् साजन श्रेष्ठं संकटाया लागि गोल याःगु खः । उगु गोल हे कासाया निर्णायक गोल जूगु खः। थुगु कासा त्यायेवं संकटा ९ गू कासापाखें १६ गू ल्याः कयाः न्यागूगु थासय् थहांवंगु दु । तर पराजित जूगु मध्यपुर धाःसा रेलिगेशन क्षेत्रय् लाःवंगु दु ।

More Stories Like this