नेपालभाषाया परिषदय् चिबाखंया अन्तरक्रिया

नेपालभाषा परिषदया ग्वसालय् बुधवाः परिषदया थःगु हे छेँय् खस नेपाली भाय्या वरिष्ठ आख्यानकार श्री ओम श्रेष्ठ 'रोदन'पाखें चिबाखंया विषयस प्राविधिक ज्ञान व अन्तरक्रिया ज्याझ्वः जुल ।

परिषदया नायः फणिन्द्ररत्न बजराचार्यया सभाध्यक्षताय् न्ह्याःगु उगु ज्याझ्वलय् मूबक्ता रोदनं चिबाखंया महत्वया बारे कनादिसें बाखं विधा यक्व पुलांगु जूसा नं चर्चाय् वयेमफूगु कनादिल । वय्कलं चिबाखंया स्वरुप, इतिहासया नापनापं बाखं व चिबाखंया अन्तरक्रियाया विषयस नं जानकारी बियादिल । थुकियालिसें खस भाषाया चिबाखं स्वयां नेपालभाषाया चिबाखंया इतिहास पुलांगु धयादिसें धुँस्वां साय्मिं च्वयादीगु मूस्वां दक्कलय् न्हापांगु खस साहित्यया चिबाखं जूगु नं धयादिल ।

ज्याझ्वलय् बाखं च्वमि शरद कसालं छपू चिबाखं ब्वनाः न्यंकादीगु खःसा शशिकला मानन्धरं न्ह्यसः तयादीगु खः ।
ज्याझ्वलय् भवानी मानन्धर, राजेन मानन्धर, मोक्ष बहादुर अमात्य, विजयरत्न असंबरे, प्रेरणा शाक्य, विमलप्रभा बज्राचार्य, दिब्या ताम्रकार, मीना बज्राचार्य, जलकृष्ण श्रेष्ठ, केदार सितु, मदनसेन बजराचार्य आदिपिनिगु ब्वति दुगु खः ।

ज्याझ्वलय् परिषदया छ्याञ्जे नबिन चित्रकारं ज्याझ्वःया बारे जानकारी बियादीगु खःसा डा. केशरी लक्ष्मी शाक्यं लसकुस यानादीगु खः । (साभार : सन्ध्या टाइम्स न्हिपौ)

More Stories Like this