मजदूरतय्सं मालिकयात मि तयाः स्यानाबिल

भारतया असाम राज्यय् च्वंगु चिया बगानया मजदूरतय्सं मि तयाः अनया मालिक व मालिक्नीयात स्याना बिउगु दु । असामया तीनसुकिया जिल्लाय् च्वंगु कुनापत्थर चिया बगानया मजदूरतय्सं मालिक मृदुलकुमार भट्टाचार्य व वयकःया जहान रीतायात बुधवाः चान्हय् मि तयाः स्यानाबिउगु खः ।

थ्यंमथ्यं ७ सःम्ह मजदूरतय्सं छेँ घेरेयानाः मि तयाबिउगु जिल्ला एसएस मिनाक्षी सुन्दरमं धाःगु दु । मि च्यानाः छेँय् दुगु निगः सवारी साधन नं नष्ट जूगु न्ह्यथंगु दु । घटना जूगु इलय् अन मेपिं कर्मचारीत नं दुगु खःसा नं म्वायेत धाःसा ताःलाःगु प्रत्यक्षदर्शीतय्सं धाःगु दु ।

छुं दिं न्ह्यः जक बगान मालिकं मजदूरतयगु आवास सुविधा चीकेगु क्वःछिइवं मजदूर व मालिक दथुइ विवाद ब्वलंगु बिबिसीं न्ह्यथंगु दु ।

प्रहरीं उगु घटनाय् दुथ्याःगु द्वपनय् स्वम्हेसित नियन्त्रणय् कयाः अनुसन्धान यानाच्वंगु दु । तर सुयात नं हिरासतय् मतःगु नं प्रहरीं न्ह्यथंगु दु ।

More Stories Like this