मंकाः बलात्कार काण्डया मिसायात उपचारया नितिं सिंगापुर
दिल्लीइ मंकाः बलात्कार काण्डया पीडित मिसायात उपचारया नितिं सिंगापुर छ्वःगु दु । १६ डिसेम्बरया सार्वजनिक बसय् मंकाः बलात्कारया शिकार जूम्ह उम्ह मिसायात भारतया मेदान्ता मेडिसिटी अस्पतालपाखें वंगु बहनी एअर एम्बुलेन्सपाखें सिंगापुर छ्वःगु खः ।
अस्पतालया चिकित्सा नायः वीडी अथानीं बांलाक्क वासः यायेगु नितिं उम्ह मिसायात सिंगापुर छ्वःगु व अनया माउण्ट एलिजावेथ अस्पतालय् वयागु थप उपचार जुइगु जानकारी ब्यूगु भारतीय सञ्चार माध्यमतय्सं न्ह्यःथंगु खः ।
जीवन व मृत्युया दोसाँधय् म्वानाच्वंम्ह उम्ह मिसायात आईसीयु लिसेया सुविधा दुगु छगू विशेष विमानपाखें सिंगापुर छ्वःगु खः । स्वक्वःतक्क शल्यक्रिया यायेधुंकूम्ह उम्ह मिसाया अवस्था तच्वःगु जूसां नं मिसां धाःसा शाहस पूर्वक पीडालिसे न्ह्यःज्याना च्वंगु उपचारय् ल्हाःदुपिं चिकित्सकतय्सं न्ह्यःथंगु खः ।
