शहिद स्मारक लिगय् अप्रत्यासित लिच्वः

बाँसबारीपाखें लिग लिडर आरसीटि पराजित

येँ न्ह्यानाच्वंगु शहिद स्मारक ए डिभिजन लिग कासाय् अप्रत्यासित लिच्वः हयेगु झ्वलय् बाँसबारी क्लबं लिग लिडर रानीपोखरी कर्नर टिम आरसीटीयात बुकूगु दु ।

येँया दशरथ रंगशालाय् जूगु बुधवाःया कासाय् बाँसबारीं रानीपाृेखरी कर्नर टिमयात निगू गोलं बुकूगु खः । बाँसबारीं रानीपोखरी कर्नर टीमया अपराजित यात्रायात पूर्णविराम जक याःगु मखु थ्रीस्टार लिसेया दुरी अप्वयेकेत नं ताःमलात । थुगु कासा बुइवं आरसीटि ९ गू कासापाखें २० ल्याः थ्यनाच्वंगु दुसा १ गू कासा म्हो म्हितूगु थ्रीस्टारया १९ गू ल्याः थ्यनाच्वंगु दु ।

बुधवाःया कासाय् बाँसबारीया मोमोडू नायक जूगु खः । वय्कलं २७ गू मिनेटय् गोलयानाः बाँसबारीयात न्ह्यःने लाकूगु जक मखु, ४७ गू मिनेटय् नं गोल यानाः दूरी तब्याकूगु खः । उखे आरसीटियात ५४ गू मिनेटय् वःगु पेनाल्टीयात नं सदुपयोग यायेमफेवं कासा त्याकेगु आशा नं म्हो जूगु खः । युगल किशोरं थ्वाःगु बल बाँसबारीया अजित प्रजापतिं पनाबिउगु खः । लिपा निखेरं छगू हे गोल मजुइवं बाँसबारी निगू गोलं कासा त्याःगु खः ।

थुगु कासा त्याःसां बाँसबारी ५ गू ल्याः कयाः अन्तिम निगूगु थासय् हे कायम जुयाच्वंगु दु ।

More Stories Like this