एसएलसी दसि पौ प्रमाणीकरण इन्टरनेटं

परीक्षा नियन्त्रण कार्यालय एसएलसी दसि पौ प्रमाणीकरण इन्टरनेटं यायेफइगु व्यवस्था याःगु दु । एसएलसी दसि पौय् शंका वन धाःसा परीक्षा नियन्त्रण कार्यालयया वेबसाइट http://verify.soce.gov.np लय् वना ब्वमिया बुदिँतिथि, सिम्बोल ल्याः व परीक्षा पास याःगु दँ उल्लेख यायेधुंकाः दसि पौ स्क्रिनय् क्यने । वेबसाइटया ग्वाहालिं दसि पौ नक्कली खः वा मखु धाइगु सिइके फइगु खँ परीक्षा नियन्त्रकं कनादिगु दु ।

परीक्षा नियन्त्रकं धाःगु कथं २०५७ लिपा एसएलसी पास जुपिं सकलं ब्वमितय्गु दसि पौ वेबसाइटय् तयेधुंकगु दु । प्रमाणीकरण ज्यायात अपु कथं न्ह्याकेत परीक्षा नियन्त्रण कार्यालयं ब्वमितय्गु दसि पौ वेबसाइटय् तःगु खः । वेबसाइटय् २०५७ निसें २०६८ तकया करिब २७ लखः ब्वमितय्गु दसि पौ तःया तःगु दु ।

ब्वमिया दसि पौ नक्कलीया आशंकाय् परीक्षा नियन्त्रण कार्यालय् प्रमाणीकरण यायेत यक्वं मनूत वइगु व प्रमाणीकरण यायेगु ज्याय् परीक्षा नियन्त्रण कार्यालय् थःगु यक्वं जनशक्ति छ्यला वयाच्वगु खँ कनादिल । आ थ्व सुविधा वयेधुंकाः परीक्षा नियन्त्रय कार्यालय् वया प्रमाणीकरण यायेगु झनझट अन्त्य जुइ नापं थ्व न्हूगु व्यवस्था यानाः परीक्षण नियन्त्रण कार्यालयया ई व जनशक्तिया बचत जुया मेमेगु ज्यालय् थ्व ई सदुपयोग यायेफइगु खँ परीक्षा नियन्त्रण कार्यालयं धाःगु दु ।

दसि पौ नक्कली आशंकाय् भारतीय आर्मी, भारत व विदेशय् ब्वनेत वनेगु ब्वमिया सम्बन्धित विश्वविद्यालय, विद्यालय, अख्तियारलगायत निकायतय्सं प्रमाणीकरण यायेत वइगु खँ कनादिल ।

More Stories Like this