मंकाः बलात्कार विरुद्ध प्रदर्शन तच्वल

भारतीय ल्यासेमचायात मंकाः बलात्कार याःगु विरोधय् कुहांवःपिं प्रदर्शनकारीतय्सं न्हू दिल्लीया विजय चोकय् शनिवाः चान्हय्निसें धर्ना बिउगु दु । अथेहे आइतवाः सुथंनिसें इण्डिया गेटय् धर्ना बियाः प्रदर्शन याःगु दु । सरकार विरुद्ध तसकं नारा थ्वयेकूसें प्रदर्शनकारीत इण्डिया गेट लिक्क च्वंगु भारतीय कांग्रेसया नायः सोनिया गान्धीया निवास तक थ्यंगु खः ।

नायः गान्धिं प्रदर्शनकारीतय्त सम्बोधन यानादिसे. दोषीयात कडा कारवाही जुइगु आश्वासन बिउसां नं प्रदर्शन धाःसा दिउगु मदुनि । प्रदर्शन अनियन्त्रित जुइवं प्रदर्शनकारीतय्त चीकेत राष्ट्रपति व प्रधानमन्त्री निवास जःखः तक न्ह्याइगु मेट्रो रेल सेवा बन्द याःगु दु ।

थ्वहे झ्वलय् प्रदर्शनकारी व प्रहरी दथुइ ल्वापू तकं जूगु दु । ल्वापू जूगु इलय् आपालं प्रदर्शनकारीत ज्वंगु धाःगु दु ।
थ्वहे दथुइ भारतीय गृहमन्त्री सुशील कुमार सिंघें पीडित ल्यासेमचायाके काःगु बयान कथं घटना सुनियोजित जूगु पुष्टि जूगु जानकारी बियादीगु दु ।

भारतय् छुं दिं न्ह्यः सार्वजनिक बसय् च्वनावनाच्वंम्ह छम्ह ल्यासेमचायात न्ह्यानाच्वंगु बसय् मंकाः बलात्कार याःगु खः ।

More Stories Like this