थ्रीस्टारयात मच्छिन्द्रं पनाबिल

शहिद स्मारक ए डिभिजन लीगय् थ्रीस्टार क्लबं शीर्ष थासय् च्वनेगु ह्वःताः त्वफिकूगु दु ।

येँया दशरथ रंगशालाय् जूगु कासाय् उपाधिया दावेदार थ्रीस्टार क्लब मच्छिन्द्रलिसे बराबरी कासा म्हितूगु खः । उगु कासाय् निखेरं छगू छगू गोल जूगु खः । कासाय् थ्रीस्टारया फेमिं २१ गू मिनेटय् गोलयानाः थःगु क्लबयात न्ह्यःने लाकूगु खः । तर थुकियात निरन्तरता बी मफयेवं कासाया ४७ गू मिनेटय् थ्रीस्टारं गोल नयेमाल । मच्छिन्द्रया लागि कप्तान दीपक राईं गोल यानाः कासा बराबरीइ हःगु खः ।

कासाया ६६ गू मिनटय् मच्छिन्द्रया इद्रिस निक्वः खुसीइ म्हासूगु कार्ड नयाः कासाख्यलयं पिहांवनेवं मच्छिन्द्र झिम्ह कासामी सीमित जूगु खः । अथेखःसां नं थ्रीस्टारं उकिया फाइदा काये मफयेवं निगूगु हाफय् छगू नं गोल जुइमफुत व कासा बराबरी क्वचाल ।

कासा बराबरी जूगुया प्रत्यक्ष फाइदा रानी पोखरी कर्नर टीम आरसीटीयात जुल । आरसीटीया ८ गू कासापाखें २० गू ल्याः कयाः शीर्ष थासय् यथावत जुयाच्वंगु दुसा १९ गू ल्याः कयाः थ्रीस्टार निगूगु व १७ गू ल्याः कयाः मच्छिन्द्र स्वंगूगु थासय् लाःगु दु ।

अथेहे आइतवाः जूगु मेगु कासाय् हिमालयन शेर्पा क्लबं सरस्वतीयात बुकाः महत्वपूर्ण स्वंगू ल्याः कायेत ताःलाःगु दु । छगू गोलं लिउने लाःगु हिमालयनं स्थितियात उल्टेयासें कासा थःगु पक्षय् हयेत ताःलाःगु खः । उगु कासाय् हिमालयन छगूया विरुद्ध स्वंगू गोलं त्याःगु खः ।

कासाया १२ गू मिनेटय् रमेश दंगालं गोल यासें सरस्वतीयात न्ह्यःने लाकूगु खःसा न्हापांगु हाफय् तक सरस्वती छगू गोलं न्ह्यःने लानाच्वंगु खः । तर निगूगु हाफय् हिमालयनया लागि पुकार गहतराज, हेमन गुरुंग व धीरज तामांगं गोल याःसे कासा थःगु पक्षय् लाकूगु खः । कासाया ६६ गू मिनेटय् माइकल निक्वःखुसी म्हासूगु कार्ड नयाः कासाख्यलं पिहांवनेवं सरस्वती झिम्ह कासामी सीमित जूवंगु खः ।

More Stories Like this