नेवाः संकिपा संगीत नाइट ११३३ क्वचाल

नेपालभाषाया संगीत व सांस्कृतिक ख्यलय् नेवाः ल्याय्म्ह पुस्ताया नुगः क्वसायेकेगु तातुनाः नेवाः जागरण मञ्चपाखें दँय्दसं न्यायेका वयाच्वंगु संगीत नाइट थुगुसी नं तःजिक क्वचाःगु दु । जागरण मञ्च अन्तर्गतया संकिपा समितिया ग्वसालय् थ्वपालय् नेवाः सकिपाया म्येय् नेपालभाषाया लोकंह्वाःपिं नापं न्हूपिं कलाकारतय्सं स्टेजय् हुलाप्याखं न्ह्यब्वःगु “नेवाः संकिपा संगीत नाइट”य् थुगुसी “राजमति” संकिपाया नकिं हिसिला महर्जन व नायः मणिराज लवटं नं हुलाप्याखं न्ह्यब्वःगु खःसा थ्वहे संकिपाया मेम्ह नायः श्रीकृष्ण महर्जन पाहाँकथं उपस्थित जूगु खः ।

ज्याझ्वलय् आशिष्मा नकःमि, भिंतुना जोशी, सुरज प्रजापति, देविना महर्जन, सुभानी श्रेष्ठ, लुमिला जोशी, अमिता जोशी, सृजना महर्जन, रुमन जोशी, सञ्जय शर्मा, विनोद श्रेष्ठलगायत थीथी कलाकारपिसं हुलाप्याखं न्ह्यब्वःगु खः । नेवाः संकिपा ख्यःया कलाकःमियात नागरिक समाजया न्ह्यःने हनेगु तातुनाकथं थुगुसी लोकंह्वाःम्ह कलाकार हरिमान दिवाकरयात न्याद्वःतका दां नापनापं सिजःपौपाखें हंगु खः ।

संकिपा संगीत नाइटया झ्वलय् हरिमानजुयात वंगु दँ ने.सं. ११३२ या लोकंह्वाःम्ह कलाकार घोषणा यासें सम्मान यायेगु ज्या जूगु खः । उगु ज्याझ्वलय् नेवाः जागरण मञ्चया नायः सुजीव बज्राचार्यं ज्याझ्वलय् लसकुसयासें न्हूपुस्ताया ल्याय्म्ह ल्यासेतय्त नेवाः सस्कृति व झीगु थःगु हे संकिपाया म्येय् मनोरञ्जन बीगु लिसेलिसें नेवाः संस्कृतिया नितिं ल्याय्म्ह ल्यासेतय्त न्ह्यःने यंकेगु उद्देश्यं जागरण मञ्चं स्वदँ न्ह्यःनिसें थुकथंया संगीत नाइट ज्याझ्वः यानावयाच्वनागु खँ तयादीगु खः । ज्याझ्वलय् संकिपा समितिया प्रमुख विजयरत्न असंबरेजुं लोकंह्वाःम्ह कलाकार हरिमान दिवाकरयात हनापौ लःल्हाःगु खःसा मञ्चया नायः सुजीव बज्राचार्यं न्याद्वःतका लःल्हाःगु खः । सम्मानित हरिमान दिवाकरयात नांजाःम्ह कलाकार श्रीकृष्ण श्रेष्ठ व संकिपा समितिया दुजः रवि महर्जनं खादां न्ययेकूगु ज्याझ्वलय् दुजः राजीव राजोपाध्यायं सिन्हः तिकूगु खः ।

ज्याझ्वलय् संकिपा संगीत नाइट यायेत थाय् बियाः ग्वाहालि याःगु नेपाः ब्याङ्क्वेटया प्रोपाइटरपिं दिनेश श्रेष्ठ व पुष्प महर्जनयात नं खादां न्ययेकाः हंगु खः ।

थीथी ख्यःया मनूत उपस्थित जूगु नेवाः संकिपा संगीत नाइटय् डिजे सुवर्णपाखें डिजे सेसन नं जूगु उगु ज्याझ्वलय् च्यासलं अप्वः ल्याय्म्ह ल्यासेतय्सं ब्वति काःगु खः ।

More Stories Like this