पानबतीया च्यारिटी शो क्यन

नेवाः जागरण मञ्च अन्तर्गत संकिपा समितिया ग्वसालय् वंगु शनिवार “पानबती” संकिपाया च्यारिटी शो क्यनेज्या जूगु दु । थौंकन्हय् तसकं बय्बय् जुयाच्वंगु नेवाः संकिपा “पानबती” प्रति स्वकुमितय्गु नुगः न्हियान्हिथं अप्वः क्वसाना वयाच्वंगु खँ थ्व संकिपाया च्वमि व निर्देशक सुरेन्द्र तुलाधरं कनादीगु दु । थ्वहे झ्वलय् ख्वपय् नं आः वैगु शुक्रवाः व शनिवाः निन्हुयंकं च्यारिटी शो जुइत्यंगु दु । निन्हुयंक जुइगु च्यारिटी शोपाखें उठे जूगु दां किड्नी ल्वचं कयाः म्हं मफुम्ह जीवन सुवालयात वासः यायेत ग्वाहालि कथं लःल्हाइगु जूगुलिं सकलें स्वकुमितय्त थ्व भिंज्याय् ग्वाहालि यायेत नं सुरेन्द्र तुलाधरं इनाप यानादिल ।

सनम शाक्य मय्जुया मेनरोल दुगु पानबती संकिपाय् विनोद श्रेष्ठ, भोगेन्द्र मानन्धर, हृदयप्रसाद मिश्र, नारायणदेवी प्रधान, मञ्जु श्रेष्ठ, सोनिका प्रजापति, सुरेन्द्र तुलाधर लगायत आपालं कलाकारत दुसा थुकिया संगीतकार गोविन्द ह्यूमत, म्येच्वमि सुरेन्द्र तुलाधर, द्वन्द्व देवकुमार महर्जन, सहायक निर्देशक सरोज बुद्धाचार्य, नृत्य भुवन श्रेष्ठ, भोगेन्द्र मानन्धर व रुपिन डंगोल, सम्पादन सुनिलकृष्ण ताम्राकार, छायांकन रत्न कार्की व सुमन तण्डुकार, कार्यकारी निर्माता रोशन बज्राचार्य व निर्माता ईश्वरमानसिंह डंगोल, सोनिका प्रजापति, प्रेम महर्जन, अच्यूत श्रेष्ठ व रामराजा भाम खः । थ्व संकिपा सुखावति फिल्मस प्रोडक्सनया नितिं अष्टमाया श्रेष्ठं न्ह्यब्वयादीगु खः ।

More Stories Like this