थ्री स्टार शहिद स्मारक लिगया शीर्ष थासय्

येँय् न्ह्यानाच्वंगु शहिद स्मारक ए डिभिजन लिग फुटबलय् यलया थ्रीस्टार क्लबं मध्यपुर युथ एशोसियसनयात बुकाः शीर्ष थासय् च्वनेत ताःलाःगु दु ।

येँया दशरथ रंगशालाय् जूगु विहिवाःया कासाय् थ्रीस्टार क्लबं मध्यपुर युथ एशोसियसनयात निगू गोलं बुकूगु खः । उगु कासाय् थ्रीस्टारया लागि ७१ गू मिनेटय् इब्राहिन व ७५ गू मिनेटय् कप्तान सन्तोष साहुखलः नं गोल याःगु खः । थुगु कासा त्यायेवं थ्रीस्टार ७ गू कासापाखें १८ गू ल्याः कयाः शीर्ष थासय् लाःगु दु । आःतक जूगु कासा मध्ये छगू हे कासा जक बूगु दु । पराजित जूगु मध्यपुर धाःसा ७ गू कासापाखें ७ गू हे ल्याः कयाः ११ गू थासय् लानाच्वंगु दु ।

अथेहे विहिवाः हे जूगु मेगू कासाय् उपाधिया दावेदार मनांग मस्र्यांदी क्लब धाःसा बराबरीइ चित्त बुझे यायेमाल । जावलाखेल युथ क्लब लिसे म्हितूगु उगु कासाय् निखेरं छगू छगू गोल जूगु खः । कासाय् मनांगं ६८ गू मिनेटय् स्टेफनया गोलपाखें न्ह्यःने लाःगु खःसा ८९ गू मिनेटय् जुमां जावलाखेलया लागि गोल यायेवं मनांग ल्याः इनेत बाध्य जूगु खः ।

बराबरी कासा लिपा मनांग ७ गू कासापाखें १५ गू ल्याः कयाः प्यंगूगु थासय् लाःगु दु । रानीपोखरी कर्नर टीम आरसीटी व मच्छिन्द्र क्लब १७ गू व १६ गू ल्याः कयाः छसिकथं निगूगु व स्वंगूगु थासय् लानाच्वंगु दु ।

More Stories Like this