लिग लिडर मच्छिन्द्रया अपराजित यात्रा क्वचाल ।

येँय् न्ह्यानाच्वंगु शहिद स्मारक ए डिभिजन लिग फुटबलय् लिग लिडर मच्छिन्द्र क्लबया अपराजित यात्रा क्वचाल । खुगूगु कासा तक अपराजित जुयाच्वंगु मच्छिन्द्रयात बुधवाः जूगु कासाय् रानीपोखरी कर्नर टीमं प्यंगू गोलं बुकल ।

एनएमबी बैंकया प्रायोजनया लिसें कासाख्यलय् कुहांवःगु मच्छिन्द्रयात बुकूगु रानीपोखरी कर्नर टीमया लागि शेखर लिम्बुं निगू गोल याःगु खःसा युगल किशोर राई व अमर डंगोलं छगू छगू गोल याःगु खः । थुगु कासा त्यायेवं आरसीटी न्हय्गू कासापाखें झिंन्हय्गू ल्याः कासें शीर्ष थासय् लाःगु दुसा पराजित जूगु मच्छिन्द्र झिंखुगू ल्याः कयाः निगूगु थासय् लाःवंगु दु ।

थुगु कासा अन्तरगत बुधवाः जूगु मेगू कासाय् संकटा क्लबं हिमालयन शेर्पा क्लबयात छगू गोलं बुकूगु दु । संकटाया रितेश खड्कां न्यय्छगू मिनेटय् याःगु गोल हे निर्णायक गोल जूवंगु खः । उगु कासाय् दिनेश कार्की घाःपाः जुइवं हिमालयन शेर्पा क्लब झिम्ह कासामी सीमित जूगु खः ।

थुगु कासा त्यायेवं संकटा झिंनिगू ल्याःया लिसें न्यागूगु थासय् लाःगु दुसा आःतक प्यंगू ल्याः जक कायेत ताःलाःगु हिमालयन शेर्पा धाःसा रेलिगेशन क्षेत्रय् लानाच्वंगु दु ।

More Stories Like this