राष्ट्रपतिं सहमतिया नितिं हाकनं ७न्हु ई तन
न्हूम्ह प्रधानमन्त्री ल्ययेत राष्ट्रपतिं ब्यूगु न्हय्न्हुया ई बिहीवाः क्वचायेवं प्यंगू दलया नेतातय्सं हाकनं न्हय्न्हुया र्इ फ्वंगु दु । न्हापांगु खुसिइ राष्ट्रपतिं ब्यूगु न्हय्न्हुया ई बिहीवाः न्हिनय् प्यता इलय् फूगु खः ।
ई फुइवं प्यंगू दलं सहमितया नितिं ज्या न्ह्रयानाच्वंगु खःसां सहमतिया नितिं ई मगाःगु व आ तनीगु इलय् सहमति यायेगु धायेवं राष्ट्रपतिं हाकनं न्हय्न्हुया र्इ तनाब्यूगु खः । राष्ट्रपति डा. रामबरण यादवं राष्ट्रिय सहमतिया सरकार गठनया नितिं धकाः अन्तरिम संबिधानया धारा ३८-१ कथं हाकनं न्हय्न्हुया म्याद तनाब्यूगु खः ।
म्याद तनेन्ह्यः राष्ट्रपतिं प्यंगू दलया शीर्ष नेतात नाप मंकाः सहलह यानादीगु खः । सहलहखे एकीकृत माओवादीया नायः पुष्पकमल दाहाल प्रचण्ड, काँग्रेस सभापति सुशील कोइराला, एमाले नायः झलनाथ खनाल व मधेशी मोर्चाया राजेन्द्र महतों ब्वति कयादीगु खः ।
प्रधानमन्त्री जुइत राष्ट्रपति ज्याकुथि निवेदन दर्ता
सहमतिया प्रधानमन्त्री चयन यायेगु राष्ट्रपति बिइगु ई क्वचाय् न्ह्य: प्रधानमन्त्रीया निंतिं निगू नां दर्ता याःगु दु । सहमति यानाः प्रधानमन्त्री चयन यायेत दलत असफल जुगू धासें ३६ दलया समर्थन ज्वना लोक कल्याणकारी जनता पार्टीया नायः किशोर महतो व हाम्रो नेपाल पार्टीया मुस्कान पौडेलं १३ दल समर्थन ज्वना राष्ट्रपतिया ज्याकुथि उम्मेदवारी दर्ता याःगु राष्ट्रपतिया ज्याकुथिं धाःगु दु ।
News Location:
