क्वचाल थक्वातय् महालक्ष्मी द्यःया सिन्दुरजात्रा

सिन्दुर जात्रा धायेवं विस्काः जात्राया इलय् ख्वपः जिल्लाया मध्यपुर थिमि नगरपालिकाय् लाःगु बालकुमारी जुइगु सिन्दुर जात्रा धकाः थुइकी । तर स्वनिगः दुने यक्वः हे थासय् सिन्दुर जात्रा जुइ धैगु खँ सायद हे मनूतय्सं स्यू जुइ । थथे सिन्दुर जात्रा जुइगु छगू थाय् खः येँ देय्या दक्षिणी क्षेत्रय् लाःगु थक्वातय् । थक्वातय् नांजाःम्ह शक्तिपीड महालक्ष्मी द्यःया जात्रा याना सिन्दुर जात्रा दँय्दसं कछलागा पारु खुन्हु याइ । सकिमना पुन्हिनिसें निन्हु तक जुइगु जात्राय् महालक्ष्मी द्यःया नापं गणेशः, भैलःद्यः व आदिनारायण द्यःया तकं जात्रा जुइ थक्वातय् । थुगु दँय् नं तःजिक न्याययोकल महालक्ष्मी द्यःया सिन्दुर जात्रा थक्वातय् ।

सिन्दुर जात्रा याये न्ह्यः सकिमना पुन्हिया दिं आदिनारायणया जात्रा याःगु खः । आदिनारायणया जात्रा क्वचायेका गणेद्यःया प्रतिमायात गमय् तयाः पूजा याना चान्हय् खटय् तःगु खः । थुखे चाफः त्वालय् आनन्द भैरवयात खटय् तया जात्रा याःगु खः । उगु हे दिं चान्हय् महालक्ष्मी शक्तिपीठय् द्यःयात गमय् तया होम याना पूजा यात । पूजाया इलय् होम याःबले छज्वः कःलि बली ब्यूगु खः । होम याना पूजा क्वचायेवं कछलागा पारुया दिं द्यः खतय् तया सिन्दुर जात्रा याःगु खः । सिन्दुर जात्रा याःबले महालक्ष्मी व गणेद्यःया निखः जक जात्रा याःगु खः । महालक्ष्मी द्यःया देगः न्ह्यःने जूगु जात्राय् गुथियारतय्सं भ्वइसिन्ह ह्वःगु खः । सुथय् धिमेबाजं, नाय्खिं बाजं व बासुरीबाजंया तालय् महालक्ष्मी व गणेद्यःया खः झण्डै स्वघौ तक खः प्याखं हुइकल । द्यःखः हुइकाच्वंगु इलय् भ्वइसिन्ह ह्वला हे च्वनी । थ्व जात्रायत थनया स्थानियतय्सं मू सिन्हःयाः धायेगु याइ ।

मू सिनःया क्वचायेका स्थानिय मनूतय्गू पूजा काइ । नगर चाःहिला पूजा कायेगु क्वचायेका निगुलिं खःयात चाफःत्वालय् भैरवया खः नापं तयेयंकेवं महालक्ष्मी द्यःया जात्रा क्वचाइ ।

थुकथं हनीगु थक्वाःया महालक्ष्मी जात्राय् द्वारे, स्यस्यः, ज्यापु, दुवाः जातिया गुथिं थःथःगु भालाय् लाःगु ज्या यानाच्वंगु दइ ।

News Location:

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन