गनं मदुगु जात्रा हाँडीगामय्

Posted on Wed Oct 31, 2012 1:45 pm NST

गनं मदुगु जात्रा हाँडीगामय् धैगु उखानं नांजाःगु हाँडी नःरया चोकदे नाराद्यःया जात्रा थुगु दँय् नं तःजिक हन । जात्राय् ब्रम्हा, बिष्णु व महेश्वर याना स्वंगू खःया जात्रा याःगु खः । कतिपून्हिया दिं स्थानिय साय्मिंतय्सं खः दयेमा । स्वखः तयार जुइधुंकाः ब्रम्हाया खःयात ठटुत्वाःया फल्चा न्ह्यःने तयेयंकी । ब्रम्हायात थ्व जात्राय् अबु कथं कयातःगु दु । अथेहे मेगु खःयात बिष्णु कथं कयातःगु दुसा थ्व खः ताःहाकगु ल्वहं न्ह्यःने तयेयंकी । मेगु महेश्वरया खः खः । महेश्वरयात मां कथं कयातःगु दु । थुगु खःयात कोटाटोलय् तयातइ । खटय् मैनया स्वा“ दयेका छाय्पिइमाः । थुगु मैनया स्वां रकमीतय्सं हे दयेकी ।
जात्राया दिं कौलागा पारु खुन्हू आचाजुपाखें न्हापालक ठटुटोलया नारायण द्यःया पूजा याना मेगू निगू खःया नं पूजा याइ । पूजा क्वचायेवं पय“ता खलःया पोंगा बाजं थानाः दकले न्हापां ठटुत्वाःया खः नीप्यम्हेसिनं ल्ह्वनी ।

निम्हेसिनं खः चाःहिकेगु ज्या याइसा छम्हेसिनं हःपा बिइ । स्वंगुलिं खः कोटाटोलय् हयेधुंकाः स्वखः नं झ्वलाक तया खः नगर चाःहिकी ।

नगर चाहिका पुजा फयेधुंकाः थःथःगु त्वाःया खः थःथःगु त्वालय् यंका जात्रा क्वचायेकी ।

थुगु जात्राय् खःया गजू क्वय् लाकाः द्यः च्वयेतयातःगु हुनिं “कहिं नभएको जात्रा हाँडीगाउँमा” धायेगु उखान हे चलेजूगु खः । छाय्धाःसा मेथाय् जात्राय् द्यःखःया गजू च्वय् व द्यः क्वय् जुइ । थ्व जात्राया बिशेषता नापं जात्रा उत्पतिया सम्वन्धय् छगू किम्वदन्ति दु । किम्वदन्ति कथं सत्ययुगय् निम्ह मिसा दयाच्वना । उपिं निम्ह मध्ये छम्ह मिसा महारानी जुयाच्वनसा छम्ह सर्वसाधारण । इपिं निम्ह प्वाथय् दुपिं । छन्हू निम्हं खँ ल्हानाच्वंगु इलय् महारानीं भचा घमण्ड याना जिं ला अःपूक हे मचा बइके धाःगु जुयाच्वन । साधारण मिसां चाहिं भगवान नारायणया कृपां जुइ धाःगु जुयाच्वन । मचा बुइगु ई जुल साधारण मिसां अःपुक मचा बुइकल । तर महारानीया प्याथय् दुगु झिंनिद“ दतं तक मचा मबू । थ्व अजूचायापूगु ज्या गुकथं जुल धकाः क्यंबले भगवान नारायण उगु इलय् नेपालय् मच्वसें हिमालय पर्वतय् वना तपस्या च्वंवनाच्वंगु जुयाच्वन । नारायणयात नेपाः हयेफःसा जक महारानीं मचा बुइकेफइगु ख“ सीकल । अले भगवान नारायणयात हिमालय पर्वतं नेपाः हयेत गनं मदुगु जात्रा क्यनेगु व गनं मछागु स्वां छायेगु धकाः हेका हःगु हुनिं जात्राया इलय् खः अःखः याःगु व मैनया स्वां दयेका छाःगु खः ।

थ्वहे किम्वदन्ति आधारित चोकदे नारायाणया जात्रा याइगु इलय् खःया च्वये तूयुगु कापतं हिनाः हिमालयया रुप बिइ । क्वय् जंगलया रुप बिइत धुनी व सयपत्री स्वांया सिमाकचा तइ । अले स्वत जाःयाना मैनया स्वां दयेका छायेपी । थुगु जात्रा स्वयेगु नितिं थीथी थासयं यक्वः हे मनूत हाँडी गामय् थ्यनेगु याः ।