क्रान्तिया भविष्य

अय् नेता भाजुपिं छिमिसं आः तकनं मचाःनि ला
ल्वाना ख्याना हालां जक देशय् शान्ति वइगु खः ला
सकलें मिले जुयाः छप्पँ जुयाः छाय् ज्या याये मफुगु
थःत मंत कि कवाफय् क्वँय् जुइगु छाय् त्वःते मफुगु

पूँजीवाद साम्यवाद न्हयागु धाःसां जनवाद हे खःनि
न्ह्यःनें ज्वंसां लिउनें ज्वंसा वहे न्हाय् ज्वनेगु ला खः नि
सिद्धान्तया नामय् इज्जतया नामय् थन छाय् ल्वापु
सकलें छखलः जुयाः ज्या थन छाय् याये मफुगु

लोकतन्त्रं हइ धाःगु शान्तिया आशा आः सीःन
नेपाःमितय् प्रतिक्षाया सिमा याकनं पुला वनी न
तं ग्वारा ग्वारा मुंकाः म्वानाच्वनेगु ई आः फइन
सह यानाः पियाच्वनेगु क्षँमताया ई आः सीन

आशा बियाः आश्वासन ज्वंकाः यक्व ध्वं लायेधुंकल
जनताया छ्यनय् मुस्या सियाः मोज याना हे च्वन
जनताया छेँय् जाकि मदु लः मदु सुयां वास्ता मदु
जनतां जक अज्याःपिं नेतातय्त वास्ता यायेमाःगु छु दु

आः वइगु क्रान्ति जुइ नेतातय्त सफाया यायेगु
छम्ह छम्ह ल्ययाः त्वाकलय् तयाः चदंक पालेगु
अनित्य अत्याचार अन्याय दक्व न्हंकेगु
सत्यम् शिवम् सुन्दरम्या पलिस्था यायेगु

अनाम

More Stories Like this