बन्द लिपा आःयागु झीगु दायित्व

कृष्णराज श्रेष्ठ

नेवाःतय्सं थःगु जातीय हकहित व प्रतिष्ठाया निंतिं स्वनिगः बन्दया ज्या¤वः यायेमाःगु सायद थ्व न्हापांगु बाध्यात्मक ज्या खः धइगु फुकसिनं थुइकेमाः । नेवाः जाति धईपं म्वायेकं म्वायेकं छु नं म्वाः मदुगु ज्या खँ मयाईपं विशिष्ट सदाचार दुपिं मनूतय्गु जातीय समूह खः ।

तर आः देय् दुनेया फुक्क जात जातिं थःगु जातीय प्रतिष्ठा स्थापना यायेगु कथं राज्य नाप थःथःगु मागत तया वयाच्वंगु इलय् नेवाःतय्सं नं थःगु हक अधिकार व प्रतिष्ठाया निंतिं राज्यनाप माग यायेगु धइगु स्वाभाविक खः । नेवाः स्वायत्त राज्य मंकाः संघर्ष समितिं थुकिया निंतिं यक्व ई न्ह्यःनिसें राज्यया विविध निकाय व पदाधिकारीपिंत थःगु मागत न्ह्यब्वयेगु ज्या जूगु खः । तर उखेपाखे छुं नं सुनुवाई मजूगुलिं बाध्य जुयाः नेवाःतय्सं नं बन्द थेज्याःगु ज्या यायेमाःगु खः । गुगु वंगु जेष्ठ १८ गतेया न्हि जूगु खः । शान्तिपूर्ण बन्दया ज्याझ्वलय् छुं जुयाः म्वाःमदुगु अराजकता खनेदुगु ज्याखँत जुल थ्व धइगु झीसं न्यनेकने यायेमाःगु विषय जूगु दु ।

नेपाः देय् दुनेया यक्व जाति मध्ये करुणा दुपिं जाति धईपं नेवाः जक खः । कतःयात दुःख बीगु धइगु हे थःगु नं दुःख खः धइगु भावना ज्वनाः म्वाना वयाच्वंपिं झी नेवाःतय्सं अराजकता जुइ कथंया मोटरसाइकल च्याकेगु साइकलया हावा लिकायेगु मोटर तछ्यायेगु थेंज्याःगु कर्पिंत दुःख जुइगु ज्या कदापि याइ मखु । थ्व फुकसिनं थुइकेमाः । थ्व शान्तिपूर्ण बन्दया झ्वलय् म्वाःमदुगु ज्या यायेगु कथं वःपिनिगु ज्या जुइफु । आवंलि थज्याःगुपाखे झीसं ध्यान बीमाः । झीगु ज्याझ्व:या कमाण्ड झी दुने हे दयेमाः । झीगु जातीय प्रतिष्ठा म्वाकेगु धइगु झीगु हे कर्तव्य खः । थ्व खँय् झी पक्का जुइमाः ।

थ्व हे झ्वलय् वंगु सरकारया नेतृत्व याःगु दलया मन्त्री व सभासद्त थःपिनिगु सरकारया पालय् तयार याःगु शहरी विकास विधेयकया विरोधय् जूगु बन्दया जुलुसय् निंतिं न्हुयाः थःगु हे पार्टीया जुलुस कथं ब्वति काःगु धइगु सत्ताय् दुबलय् छगू सत्तां पिने सडकय् वइबलय् मेगु पह क्यनेगु नेपाःया राजनैतिक दलत व नेतातय्गु बांलाःगु संस्कृतिया रुपय् झीसं थुइकेमाः । थज्याःगुपाखे झी सजग जुइमाः ।

विविध विचारधारा दुपिं फुक्क नेवाःतय्गु जातीय आन्दोलनयात थःथःगु राजनैतिक पार्टीया किचः बीगु कथं झी सुनां नं अज्याःगु ज्या याये मजिउ । विचारधारा धइगु छगू जातीय एकता धइगु मेगु विषय खः । जातीय आन्दोलनया नेतृत्व यानादीपिंत हयाः बांलाक थुइकाः बीमाःगु खना । झीगु आजु झीगु जातीय प्रतिष्ठा स्थापना खः । थ्व धइगु झीगु सामुहिक एकतां जक पूवनी धइगु खँ निभाः थें प्रस्ट दु । थ्व झी फुकसिनं बांलाक थुइकाः आवंलि न्ह्यायेमाःगु झीगु दायित्व जूगु दु । अथे हे राज्यया लागा राज्यया साधन श्रोत राज्य दुने यायेमाःगु मू ज्याया पहिचान नेवाः एकताया सम्बन्धय् झी न्हिंन्हिं हे परिपक्व जुजुं न्ह्यायेमाःगु नं थौं झीगु ब्वहलय् वयाच्वंगु मेगु छगू दायित्व जूगु दु ।

More Stories Like this