यःसिं क्वःथला यँयापुन्हि क्वचायेकल

यंलागा तृतिया बुधवाः खुन्हू बहनी ९ बजे जुया ४७ मिनेटया साइटय् यःसिं क्वथला ने.सं.११३२ या यँया क्वचालयेकल । हनुमानध्वाखा कालभैरव न्ह्यःने वंगु यंलाथ्व द्वादशी विहीवाः सुथय् ९ बजे जुया ३१ मिनेटया साइटय् थना सुरु जूगु यँया यःसिं क्वथलेवं विधिवत रुपय् क्वचाइ ।

नानिचा याः धकाः यःसिं क्वथले न्ह्यः कुमारी छेँ नं कुमारी, गणेश व भैरवया खःयात मरुं प्याफः यटखा, न्यत जुया किलाघलय् सालेगु परम्परा दु । किलाघलं वंघः जुया हनुमानध्वाखां कुमारी छेँ थ्यंका याः न्यायेकूगु खः । याः न्यायेधुंकाः कुमारी, गणेश व भैरवयात मू लुखां लसकुस याना दुतयंकल ।

नानिचायाः क्वचायेवं उगु हे दिं कुमारी माजुया ल्हातं राष्ट्रप्रमुखं सिन्ह तिइमाःगु परम्परायात निरन्तरता बिइत राष्ट्रप्रमखु राष्ट्रपति डा. रामवरण यादव कुमारी छेँ झाया सिन्ह तिनादीगु खः । वयां लिपा सर्वसाधारणयात कुमारी माजुं सिन्ह तिकूगु खः ।

थ्वसिवें न्ह्यः यःसिं थना निन्हू दुखुन्हु यंलाथ्व चतुर्दशी खुन्हु क्वहने याः धकाः कुमारी, गणेश व भैरवया रथयात्रा मरुं क्वय्या त्वालय् जूगु खः । मरुं चिकंमुघः, न्हूघः, ज्याबहाः, लगं, गोफः, ब्रम्हत्वाः, ओन्दे, ह्यूमत, कोहिती, भिंद्यःत्वाः, मरु जुया कुमारी छेँ थ्यंका याः न्यायेकूगु खः ।
क्वहने द्यः खः चाःहिकूबले, लाखे प्याखं, पुलुंकिसि प्याखं, हलचोक सवभकु प्याखं नं क्वहने चाःहिकूगु खःसा न्हुघः दबली किलाघःया दीप्याखं हुइकूगु खः । क्वहनेयाः बले स्वंगुलिं द्यःखः ह्यूमतय् थ्यनेवं मत हिइका क्यनेमाःसा न्हुघलय् रामचन्द्रद्यःया छेँ नं समय् बिइमाःगु परम्परा दु ।
याः न्यायेधुंकाः मरुं दागिं पिकागु खः । दागिं थहने क्वहने चाःह्यूबले दुगु दँय् दिवंगत जूपिनि जहानं दागिंनापं ल्यूल्यू थहने क्वहने चाहिलेमाः । दागिं लिपा न्हय्सः साय्मितय्सं बहुमत पिकागु खः ।

यंया पुन्हिखुन्हु थहने याः धकाः कुमारी, गणेश व भैरवया द्यःखःयात मरुं प्याफः, यटखा, न्यत, त्यंगः, थाय्मदु, असं, जनबहाः, वंघः, हनुमानध्वाखा जुया द्यःछेँ थ्यंका याः न्यायेकूगु खः । थहने याःया इलय् द्यः वंगलय् थ्यनेवं वंघः आजुया म्हुतुं व हनुमानध्वाखाय् हाथुआजुया म्हुतुं हाथु हायेकूगु खः ।

News Location: