छु दु आइफोन ५ य् ?

वंगु शुक्रवाःनिसें बजारय् वःगु आइफोन ५ स्वन्हुया दुने पचास लाख गः चुइधुंकूगु दु । आःतकया दक्कले बांलाःगु आइफोन कथं पिदंगु थुगु स्मार्ट फोनया छु छु विशेषता दु छक्वः दुवाला स्वये -

प्रोसेसर
आइफोन ५ य् दुवेल कोर ए ६ प्रोससर दु । थुगु प्रोसेसर न्हापाया आइफोन ४ एसय् छ्यलातःगु ए ५ प्रोसेसर स्वयां निदुगं याकनं चले जुइ ।

अपरेटिङ्ग सिस्टम
आइफोन ५ य् आएओएस ६ न्हूगु अपरेटिङ्ग सिस्टम दु । नक्सा फोन कनेक्सन फेस टाइम ख्वाः स्वयाः फोनय् खँ ल्हायेगु आदि आएओएस ५ य् दुगु कमी कम्जोरीयात थुकिइ सुधार याःगु दु ।

८ एमपी क्यामरा
थुकिइ ८ मेगा पिक्जेलया क्यामरा दु गुकिइ न्हापाया स्वयां बांलाःगु स्तरया फोटो व भिडियो कायेफइ । लिसें आइफोन ५ य् प्यारानोमिक भ्यू छुं थासय् क्यामरा चाःहिइकाः तःहाकःगु दृष्य कायेगु प्रविधि नं तःगु दु ।

सिरि अपडेट
'सिरि' धयागु एप्लीकेशन आइफोन ४ एस निसें सुरु जूगु खः । झीसं न्ववनाः आइफोनयात निर्देशन बियाः फोन यायेगु इमेल व्छयेगु मौसम न्यनेगु थेन्याःगु सुवाधा थुगु आइफोन ५ य् अझ सुदृध जूगु दु ।

आकार प्रकार
आइफोन ५ आकारय् न्हापा न्हापाया आइफोन स्वयां तःहाकः तर थुकिया तौल धाःसा ११२ ग्राम जक दु । मेमेगु स्मार्ट फोनया तुलनाय् आइफोन ५ तसकं चीफि । स्क्रिनया साइज प्यंगु ईञ्च दु ।

ब्याट्रि
सुम्क तयातःसा आइफोन ५ मुक्कं २२५ घौतक चले जुइ । लगातार खँ ल्हानाच्वंसा थ्व च्याघौतक चले जुइ ।

नक्सा
न्हापा न्हापाया आइफोनय् गुगल म्याप तयातःगु खःसा आः आइफोनय् एप्प्लया थःगु हे नक्सा वःगु दु । थुकिइ थ्रीडि नक्सा नं स्वये ज्यू ।

इन्टरनेट
इन्टरनेट ब्राउजिङ न्हापाया स्वयां तसकं याकनं चले जुइ ।

थुगु फोनंनिसें एप्पल कम्पनीं आइफोनय् गुगल म्याप लिकाःगु निसें गुगलया युट्यूब एप्लीकेशन नं लिकाःगु दु । तर ब्राउजरय् वनाः धाःसा युट्युब आः नं चले जू नि ।

More Stories Like this