नेवाः देय् दबूया तःमुँज्याय् प्रधानमन्त्रीं यानादीगु सम्बोधन

नेवाः देय् दबूया झिंच्याक्वःगु बुन्हि व खुक्वः तःमुँज्या उलेज्याया झ्वलय् प्रधानमन्त्री डा. बाबुराम भट्टराईं नेवाः भासं यानादीगु पूवंगु सम्बोधन न्ह्यब्वयाच्वना ।

हनेबःम्ह नायः भाजु
हनेबःहपिं संरक्षक भाजुपिं व सल्लाहकारपिं,
देय् न्यंक झायाच्वनादीपिं सकल प्रतिनिधि पासापिं,


ज्वज्वलपा !
नेवाःतय् प्रतिनिधिमूलक राष्ट्रिय संस्था नेवाः देय् दबूया खुक्वःगु तःमुंज्या उलेज्याय् मूपाहां कथं ब्वतिकायेगु जितः गुगु अवसर बियादिल उकिया निंतिं ग्वसाः खलःयात आपालं आपालं सुभाय् ! जिगु निंतिं थ्व छगू लसताया जक खँ मखसें नेवाः समाजपाखें जि प्रतिया दुग्यंगु मतिना व हनाबना कथं जिं तायेका । नेवाःत नाप जिगु तःदँ न्ह्यवनिसेंया बांलागु स्वापु दुगु खःसां थुकथं राष्ट्रिय स्तरया नेवाःतय् ग्वसालय् जुयाच्वंगु थुज्वःगु अतिकं तःजिगु ज्याझ्वलय् ब्वतिकयाच्वनागु जिगु न्हापांगु अनुभव नं खत । थ्व ल्याखं नं जितः भचा भावुक दयेका बियाच्वंगु खत ।

नेवाः छगू देय्या मू आदिवासी समुदायया ल्याखं थ्वया थःगु विस्कं म्हसीका दु, नेवाःतय् हे कला, संस्कृतिया माध्यमं थौं विश्वन्यंक नेपाः देय्या इज्जत प्रतिष्ठा धस्वानाच्वंगु दु, थ्व ला सकसिनं छप्वाः म्हुतुं धयावयाच्वंगु खँ खः । उलि जक मखु, नेपाःयात सामाजिक, राजनीतिक व आर्थिक रुपं च्वन्ह्याकेगु अले युग कथं न्हू न्हूगु ह्यूपाः हयेगु आन्दोलनय् नं नेवाःत उलिहे न्ह्यःने लाः । राणा शासन विरुद्धया अभियाननिसें दक्कले लिपाया जनयुद्ध व जनआन्दोलनया झ्वलय् नं नेवाःतय्सं अग्रणी भूमिका म्हितल । अझ नेपाःया वामपन्थी आन्दोलन व नेपाल कम्यूनिष्ट पार्टीया संस्थापनया इतिहासयात लुमंकेगु खःसा नेवाःतय् विशिष्ट भूमिका दु ।

छुं ई थुखेंनिसें जिं सतिक्क च्वनाः अध्ययनयायेगु व दुवालेगु यानाच्वना, विशेष यानाः देसय् न्ह्यानाच्वंगु शान्ति स्थापना व संविधान निर्माणया मुद्दाय् नेवाःतय् भूमिका अतिकं सकरात्मक व च्वछायेबहः । नेवाःतय्गु थुकथंया पलाः मेमेगु आदिवासी जनजाति, उत्पीडित व ल्यूने लानाच्वंगु समुदायया निंतिं नं छगू हःपाः थें जुयाच्वंगु दु । अथेहे थ्व इलय् राज्यया ब्वहलय् दुगु भाला धैगु संविधान सभाया माध्यम न्हूगु संविधान दयेकाः जनयुद्ध व जन आन्दोलनया झ्वलय् जनतां अनुमोदनयाःगु संघीयता, लोकतान्त्रिक गणतन्त्र, धर्मनिरिपेक्षतायात संस्थागत यायेगु खः । तर, प्रमुख दलतय् दथुइ सहमति जुइमफुगु कारणं राष्ट्रिय राजनीतिया लँपु भचा स्पष्ट जुइ मफयाच्वंगु दु । अथे खःसां छिकपिं नेवाःत, अले देय्या सकल आदिवासी जनजाति, मधेशी, मुस्लिम, दलित व महिला समुदायपिन्सं गुकथं पहिचान सहितया संघीयताया सुनिश्चितताया निंतिं सः थ्वयेकाच्वंगु दु, न्हूगु संविधानय् थुगु मुद्दा संस्थागत जुइ ला मजुइ ला धैगु गुगु न्ह्यसः छिकपिंके दु, जिं छिकपिनिगु थुगु तःमुंज्याया दबुलिं धयाच्वना, जि, जिगु नेतृत्वय् दुगु सरकार अले जिमिगु एकिकृत नेपाल कम्यूनिष्ट पार्टी (माओवादी) सदां छिकपिनिगु पक्षय् दु । नेवाःतय्सं गुगु कथं पहिचान दुगु स्वायत्त राज्यया पक्षय् सः थ्वयेकाच्वन, थुकि सदां थें थौं नं थ्व दबुलिं जिगु प्रतिवद्धा प्वंकाच्वना ।

जितः, छुं नं विश्वास दु धाःसा, संघीयता, गणतन्त्र व धर्मनिरिपेक्षताया नापनापं जनताया पक्षया अधिकार सुनिश्चित यायेगु अभियानय् छिकपिनिगु थुकथंया तिबः दयाच्वन धाःसा राजनीतिक ख्यलय् न्ह्यागु कथंया पंगः व समस्या दुसां नं छगू विन्दुइ थ्यंकाः जनताया चाहना कथं झी न्हूगु संविधान दयेकेत सफल जुइ, थुकिया माध्यमं झी शहीद अले अग्रजपिन्सं म्हगसय् म्हंकावं कथं धाथें न्हूगु नेपाः धस्वाःका, छगू अग्रगामि व उन्नत अले सम्वृद्ध राष्ट्र कथं गर्वयायेगु अवसर झीत दइ ।

छिकपिनिगु थ्व महत्वपूर्ण तःमुंज्या ताःलायेमाः । तःजिक क्वचायेमाः । नापं तःमुंज्यां सक्षम, सवल व सशक्त न्हूगु नेतृत्व ल्ययेत नं ताःलायेमाः । जिगु दुनुगलंनिसं भिंतुना द्यछाना । हानं छक्वः भिंतुना ! भिंतुना ! भिंतुना !

More Stories Like this