ग्लेमरस तीज

धायेत ला थौंकन्हय् देशय् भाइरल ज्वरोया महामारी न्यनाच्वन धाइ । झी मध्ये गु ला थुकिं प्रभावित नं जुयाच्वंगु दयेफु । तर यथार्थय् थौं नेपाःयात धात्थें हे प्रभावित यानाच्वंगु महामारी धाःसा भाइरलया महामारी मखु तीजया महामारी खः । थ्व इलय् तीज छगू संस्कृति जुयाः मखु बल्कि छगू महामारी जुयाः झीगु छ्यनय् बज्रे जुयाच्वंगु दु । सक्कली तीज गुकुन्हु लाइगु खः व सखे तीज न्यायेकीपिंसं नं ठ्याक्क धाये मफुनि जुइ तर नक्कली तीजं धाःसा नेपाः लगायत विदेशय् च्वंपिं नेपाःमितय्‌त नं तीस जुइक हे ज्वरो वयेका बीधुंकूगु दु ।

धाइपिसं ला धया नं च्वंगु दु तीजय् यक्व हे विकृति वल । तर झी जुलं नेवाःत तीज नखःया गगु पतिइ पार्ट विकृति खः व गुगु पतिइ पार्ट संस्कृति खः व झीस मसिउ । सिउगु थुलि हे जक खः तीजया रौनक दँय्दँसं हे थुभनं तच्वया वनाच्वंगु दु कि आः उकिं नेवाः मिस्त नं प्रभावित मजुसें च्वने मफयेधुंकल । थौंकन्हय् टिभीइ नं खनदे तीजया लसताय थाय् थासय् जुइगु महोत्सवय् झी नेवाः मिस्त नं थुकुथुकु मिंक जँ संकाच्वंगु दइ चाहे व जीरो फिगरया जँ जुइमा वा भकारी साइजया जँ जुइमा ।

प्रभावित जुइगु अस्वाभाविक नं मखु । छाय्‌धाःसां तीज आः सास्कंतिक पर्व जक मखये धुंकल । थ्व ला आः फेशन डिजाइनर तिसा वसः फुड फेस्टिभल ग्लेमर व रोमान्स ल्वाकछ्यानातःगु छगू उत्कृष्ट स्तरया क्वाति नखः जइधुंकल । न्हापा न्हापा जूसा तीज धइगु धार्मिक सामाजिक संघ संस्थातय्सं ग्वसाः ग्वइगु । आः थुकियात व्यापारी व इभेन्ट म्यानेजरतय्‌सं हाइज्याक याये धुंकल । थौंकन्हय् तीजया ग्वसाः खलः कि साडी कम्पनी जुइ कि फेशन डिजायनर जुइ कि मखुसा ब्यूटी पेजेन्टवाला जुइ । थ्व समग्र उत्पादकतय् आक्रमणं यानाः थाकन्हय्‌या तीज थुलि तडकभडकं जायेधुंकल कि आः उकिया चकाचौधं थ्व नखतय् संस्कृति धइग वस्त ला आयोग गठन यानाः माःसा नं लुइके मफइगु जुइधुंकल । तीज नखतय् आः तीज हे मदु । थौंकन्हय् झी खँय्‌नी तताकेहेँपिंसं तीज हे मदुगु तीज हनाच्वंगु दु । गुगु तीजय स्वयम तीज हे ला मद अन महाद्यःप्रतिया भक्ति भाःतप्रतिया श्रद्धा व संस्कृतिया विश्वास ला गन गन का । थौं तीजं झी नेवाःनी तःकेहेँपिंत नं गुगु आकर्षित यानाच्वगं खः व वास्तवय् तीजया आकर्षण मखु तीजया नामय् जुइगु तडकभडकया आकर्षण खः । तीज ला आः थुलि सेक्सी जुयाच्वंगु दु कि थुकी मिस्तय्‌गु ला खँ हे त्वःते मिजंत नापं होश हे मदयेक आकर्षित जुयावःगु दु । मखुसा राजेश हमाल व सुशील कोइराला थेंज्याःपिं सुकुमार ल्याय्म्हुत मिस्तय् हुलय् अथें जँ संकः वन जुइ ला न्ह्याःसा छि नं झासँ तीजय् तीज न्यायेकेम्वाः थुकिया ग्लेमर जक त्वना वःसां गाः ।

More Stories Like this