२९ गते नं नेपाल बन्दया घोषणा

२८ गते देय्न्यंकं मसाल जुलुस

येँ(झीगु स्वनिगः)

मुलुकया राजनीतिक तरलता नापं अन्यौलताया दथुइ आः हाकनं आन्दोलनया ज्याझ्वःत झन झन तिब्र जुयाः वइगु अवस्था ब्वलंगु दु । नेकपा—माओवादीया अखिल क्रान्तिकारीनिसें थीथी राजनीतिक दलया विद्यार्थी संगठन नापं यानाः गुंगू विद्यार्थी संगठनं वइगु २७ गते बुधवाः नेपाल बन्द यायेगु घोषणा यानातःगु दुसा आः वयाः नेकपा—माओवादीं नं थ्व हे वइगु भदौ २९ गते शुक्रवाः नेपाल बन्दया घोषणा याःगु दु ।

उगु पार्टीं प्रधानमन्त्रीयात म्हिगः सोमवाः प्रधानमन्त्री डा. बाबुराम भट्टराईयात ७० बुँदाया माग पत्र लःल्हाःगु इलय् प्रधानमन्त्री भट्टराई नं मागपत्रया विषययात कयाः छुं नं कथंया सकारात्मक प्रतिक्रिया प्वंकाः मदीगुलिं धकाः नेकपा—माओवादीं अथे बन्दया घोषणा याःगु खः । तत्कालिन संयुक्त जनमोर्चाया नेतृत्व यानाः स्वयं आःया प्रधानमन्त्री डा. भट्टराई नं तत्कालिन प्रधानमन्त्री शेरबहादुर देउवायात ४० सूत्रीय माग पत्र पेश याःगु नापं थप ३० सूत्रीय माग दुथ्याकाः म्हिगः नेकपा—माओवादीं प्रधानमन्त्री भट्टराईयात अथे मागपत्र लःल्हाःगु खः ।

उगु इलय् प्रम भट्टराई नं ४० बुँदाया मागया मू मुद्दा संविधानसभाया निर्वाचन जुइ धुंकूगु खँ न्ह्यथसें ७० बुँदाया माग पत्र जनताया दथुइ भ्रम ब्वलंकाः आन्दोलनया नितिं त्वहः दयेकूगु धकाः प्रतिक्रिया बियादीगुलिं नेकपा—माओवादीया नेतातसें राष्ट्रियता, जनतन्त्र व जनजीवीकाया सवालय् १७ दँ न्ह्यः स्वयं डा. भट्टराई नं न्ह्यब्वयादीगु माग पत्रयात नजरअन्दाज यानाः पुलांपिं हे शासकत थें जुयाः क्यंगुलिं अथे आकाझाकां नेपाल बन्दया घोषणा याःगु खः ।

प्रधानमन्त्री भट्टराई नं माग पौ लःल्हानाः कायेगु झ्वलय् १७ दँ न्ह्यः स्वयं थःम्हेस्यां तत्कालिन सरकारयात बियागु ४० बुँदाया माग मध्ये मू मुद्दा सम्वोधन जुइ धुंकूसां नं शान्ति व संविधान निष्कर्षय् थ्यंके मफुगु खः धकाः न्ह्यथसें आः नेकपा—माओवादीं हःगु ७० बुँदाया माग औचित्य हिन धकाः तकं धयादीगु खँ न्ह्यथसें पेट्रोलियम पदार्थय् भाः थकयागु मदु धकाः तकं दावी यानादिल । अन्तर्राष्ट्रिय बजारय् भाः थाहां वंगुलिं जक नेपालय् नं पेट्रोलियम पदार्थया भाः थाहां वंगु खः धकाः तर्कतसें थःम्हं भाः थकयाः जनतायात दुःख बियागु मदु धकाः नं धयादिल । अथे हे प्रम भट्टराई नं भारतीय कम्पनीलिसे त्रिभुवन अन्तर्राष्ट्रिय विमानस्थलया व्यवस्थापन यायेगु विषययात कयाः छुं नं कथंया सहमति यानागु मदु धयादिल । वर्तमान सरकारयात गुगु कथं भारतीय पक्ष जुल नापं विमानस्थल भारतयात लःल्हाये त्यन धकाः द्वपं ब्यूगु धैगु नेकपा—माओवादीं जनताया दथुइ भ्रम ब्वलंकेगु नापं चर्चाय् वयेगु नितिं जक त्वहः तयाः च्वंगु खः धकाः तकं धयादिल । म्हिगः सोमवाः येँया शान्ति वाटिकाय् मुनाः द्वलंद्वःम्ह कार्यकर्ता व जनताया उपस्थितिइ जुलुस हे पिकयाः सिंहदरवारय् वनाः प्रधानमन्त्रीयात ७० बुँदाया माग पेश याःगु खः ।

नेकपा—माओवादीया न्वकु सीपी गजुरेलं प्रधानमन्त्रीयात उगु माग पौ लःल्हाःगु खः । प्रधानमन्त्रीयात माग पत्र लःल्हानाः लिहां वयेगु झ्वलय् पत्रकारतलिसे खँल्हासें नेता गजुरेलं उगु कथं प्रधानमन्त्रीया धापू न्ह्यथसें मागयात कयाः छुं नं कथंया प्रतिबद्धता प्वंकेगु ज्या मयाः धायादिल । थ्व हे दथुइ उगु पार्टीं अनामनगरया हनुमानस्थाय् याःगु कोणसभाय् नेता गजुरेलं आ ःआन्दोलन बाहेक विकल्प मदु धकाः न्ह्यथसें वइगु २९ गते शुक्रवाः नेपाल बन्द यायेगु धकाः घोषणा यानादीगु खः । बन्दयात ताः लाकेगु नितिं २८ गते विहिवाः देय्न्यंकं मसाल जुलुस पिकायेगु नापं पेट्रोलिम पदार्थय् भाः थकाःगु विरोधय् विद्यार्थीतय्सं थ्व हे २७ गते बुधवाः नेपाल बन्द यायेगु धकाः घोषणा यानातःगुयात पूर्ण समर्थन यायेगु जुइ धकाः नं नेता सीपी गजुरेलं धयादिल । २९ गतेया नेपाल बन्द धुंकाः नं प्रधानमन्त्री डा. बाबुराम भट्टराई नं ७० बुँदाया मागयात माःगु कथं सम्वोधन मयात धाःसा सशक्त ढंगं न्हूगु कथंया आन्दोलन यायेगु ख्याच्वः नं नेता गजुरेलं बियादीगु दु ।