पोखराया निर्माणाधिन विमानस्थल ठेकेदारयाके

एमाओवादीपाखें घुस कयागु स्वीकार

येँ (झीगु स्वनिगः)

वर्तमान कामचलाउ सरकारया नेतृत्व यानाच्वंगु दल एकीकृत नेकपा (माओवादी)पाखें कास्कीया पोखराय् दयेकाच्वंगु विमानस्थलया ठेकेदारलिसे ध्यबा कयागु खः धकाः स्वीकार याःगु दु । एमाओवादीं विमानस्थलया ठेकेदारयाके कमिशन काल धकाः बय् बय् जुइवं उगु पार्टीं अथे पत्रकार सम्मेलन यानाः घटनायात कयाः घुस कयागु खः धकाः स्वीकार याःगु खः ।

म्हिगः सोमवाः एमाओवादीया पोखराय् च्वंगु ज्याकुथिइ छगू पत्रकार सम्मेलन यानाः उगु पार्टीया कास्कीया इन्चार्ज झलकपाणी तिवारीं ठेकेदारलिसे थःगु पार्टीया पुलांम्ह सभासद राजकाजी गुरुङ करणया माध्यमं ध्यबा कयागु खः धकाः स्वीकार यानादीगु खः । वय्कलं ५० लख तका कमिशन कयागु मदु धकाः जिकिर यानादीगु दु । तिवारीं पार्टीया नितिं धकाः ध्यबा करणं काःगु खः धकाः बचाउ यानादिल । वय्कलं धयादिल ‘पार्टीया नितिं सहयोग काःगु खः । सुं नेताया नितिं मखु ।’ पोखरा अन्तर्राष्ट्रिय विमानस्थल दयेकेमाःगु माग यानाः स्थानीयवासीं आन्दोलन तच्वयेका वयाच्वंगु अवस्थाय् एमाओवादीं विमानस्थल दयेकेगु नितिं ठेकेदारयाके ध्यबा काःगु खँ सार्वजनिक जूगु खः ।

एमाओवादीया नायः पुष्पकमल दाहाल प्रचण्ड व प्रधानमन्त्री डा. बाबुराम भट्टराई पोखराय् प्रशिक्षणया नितिं वंगु इलय् अन कार्यकर्तातय्सं उगु घटनाया बारे ह्यसः थनेगु ज्या याःगु खः । न्हापां पुलांम्ह सांसद करणं याकःति कथं ध्यबा काःगु हल्ला वःगु खःसा लिपा उकिया रहस्य झन झन खुलेजुयाः वःगु खः धकाः छम्ह कार्यकर्तां धयादीगु दु । उम्ह कार्यकर्तां संचारकःमितय्त कनादिल ‘सुरुइ पुलांम्ह सभासद करणं याकःति कथं ध्यबा काःगु हल्ला वःगु खः, लिपा यक्व ध्यबा मखु धकाः ५० लाख तक काःगु सीदत ।’

विवाद तच्वया वनेवं साउन २८ गते ग्वसाःग्वःगु एकीकृत माओवादीया प्रशिक्षण भेलाय् एमाओवादीया महाधिवेशन आयोजक समितिया दुजः नापं तत्कालिन तमुवान राज्य समितिया सेक्रेटरी हरि अधिकारी कुमारं ५० लाख तका ध्यबा ठेकेदारं काःगु स्ीकार यानादीगु खः । वय्कलं उगु ध्यबा पार्टीया थीथी जनवर्गीय संगठनयात इनाः हिसाव किताव तकं सार्वजनिक याये धुंकूगु दु । न्हूगु विमानस्थल निर्माण प्रारम्भिक चरणया तारजाली व जमिन माथं वंकेगु नितिं जक थ्यंमथ्यं ११ करोडसिबें अप्वः ध्यबाः खर्च जुइ धुंकूगु दु ।