नेवाः या नेपालमण्डल म्ये

लाभरत्न तुलाधर

जिगु म्ये जिगु हे किचः मखु
न्यंपिनि किपालु नं जुइफु ।
थुगु सः छम्हसिगु रहर मखु
छं सः तनेसा लबु जुइफु ।

गनं ध्याकुंचाय् हाःगु ख्वबि
फसय् अथें हे सुना वनेफु ।
पुचः मुनाः छसलं हालेसा
तच्वःगु भुखाये ब्वयेकेफु ।।

दुःख चिली मखु थःत कुनां
न्हिउसा याकःचा वँय् धायेफु ।
म्हुचिनाः ल्हाःपा, वाक्कु छिनाः
हर्हर न्हिउसा ब्वाला कायेफु ।।

छम्हस्यां मेम्ह नेवाः मथुयाः
थवंथवय् कचवं जुइफु ।
सकलें मुने , जानाः सकलें
तंगु नेपालमण्डल थुइफु ।।

More Stories Like this