छोरीमैयाँ मालेत समिति नीस्वन, रिले अनसन स्थगित

Posted on Tue Aug 14, 2012 9:32 pm NST

फागुण १६ गते निसें तनाच्वंम्ह छोरीमैयाँ महर्जन मालेत सरकारयापाखें छगू छानबिन समिति नीस्वंगु दु । समिति नीस्वनेवं छोरीमैयाँ मालेत दवाब कथं न्ह्याना वयाच्वंगु दवाबमूलक रिले अनसन न्यान्हुया दिंनिसें स्थगित जूगु दु ।

सरकारं छोरीमैयाँ महर्जनयात मालेत गृह मन्त्रालयया सहसचिव गोकर्ण मणि दुवाडीयाया संयोजकत्वय् प्यम्ह दुजः दुगु छानविन समिति नीस्वगुं खः । उगु समितिइ महानगरीय प्रहरी आयुक्त ज्याकुया डीआईजी परशुराम खत्री, राष्ट्रिय अनुसन्धान विभागया निरज कुमार श्रेष्ठ व महान्यायाधिवक्ता ज्याकुया राजकुमार कोइराला दुज कथं दी । समितिं छवाःया दुने सत्य तथ्य छानविन यानाः प्रतिवेदन लः ल्हाइ धाःगु दु ।

उगु रिले अनसन स्थगित याये न्ह्यः छोरीमैयाँ दवाब पुचःया संयोजक भाजु रामबहादुर डंगोलं आन्दोलन स्थगित जक जूगु धयादिसें यदि छानविन समितिं निष्पक्ष छानविन मयात धाःसा हानं कडा सघर्षय् कुहां वयेगु खँ धयादिल । लिपा समितिया संयोजक डुवाडीं अनसन च्वनाच्वंपिंत जुस त्वंकाः रिले अनसन स्थगित याकूगु खः । उगु अनसनयात स्थगित यायेत छानविन समितिया संयोजक व संकल दुजत उपस्थिति जूगु खः ।

दवाब पुचलं छानविन समितिया विस्तृत अध्ययन धुंकाः जक थप संघर्षया ज्याझ्वःत घोषणा यायेगु खँ धाःगु दु । छोरीमैयाँ दवाब पुचलं छोरीमैयाँ मालेत हस्ताक्षर संकलन, चक्काजाम, जुलुस प्रर्दशन व थीथी कथंया दवाबमुलक ज्याझ्वःत न्ह्याके धुंकगु दुसा लिपांगु इलय् श्रावण २६ गतेनिसें ३२ गतेतक बसन्तपुरया महादेव पार्वती दबूलिइ छवाःतकया निंतिं न्हि १२ घण्टाया ल्याखं रिले अनसन न्ह्याकूगु खः ।

किपा:- मनोज सायमी