एमाओवादी, कांग्रेस व एमाले मिलेयायेगु भारतया डिजाइन
येँ (झीगु स्वनिगः)
मुलुकयात राजनीतिक निकास बिइगु अले जनताया नितिं न्हूगु संविधान हयेगु यात बेवास्ता यानाः एकीकृत नेकपा (माओवादी) नेपाली कांग्रेस व नेकपा (एमाले)या थःथःगु कथं छगू हे डिजाइन सरकार जूगुलिं हे निकास बिइ मफयाच्वंगु खः धकाः मनूतय्सं टिप्पणी यानाहःगु दु ।
अथे स्वंगुलिं दलपाखें नं मूल रुपं सरकारया सवालयात हे कयाः यक्व बहस यानाच्वंगु नापं छगू दलं मेगु दलया नेतृत्वया सरकारयात अस्वीकार यायेगु नापं थःपिनिगु दलया हे नेतृत्वय् सरकार दयेकेमाः धकाः अडान कयाच्वंगुया मूल कारण धैगु चुनाव हे खः धकाः राजनीतिक विश्लेषकतय्सं धायेगु यानाहःगु दु ।
भच्चा न्हापा भच्चा लिपा न्ह्यागु हे जूसां चुनावय् वनीगु अले चुनावय् वनीगु इलय् थःपिनिगु नेतृत्वय् सरकार दत धाःसा यक्व सिट त्याकेफै धकाः तायेकाः हे अथे सरकारय् मिखा तयाच्वंगु खः धकाः धयाहःगु दु । थ्व स्वंगू दलया नेतातय्गु नं मंकाः तिर्थ स्थल भारत हे जुयाच्वंगु नापं भारतया सरकारं आःया अवस्थाय् चुनावयात हे प्राथमिकता बियाच्वंगुलिं थन नेपालय् थ्व स्वंगू दलया नेतातय्सं सरकारया सवालयात हे कयाः कचमच यानाच्वंगु खः धकाः नं धयाहःगु दु ।
भारत थ्व इलय् एकीकृत माओवादी, कांग्रेस व एमालेयात हे गठबन्धन याकाः चुनावय् वन धाःसा थ्व हे स्वंगू दल दक्ले तःधंगु दलया रुपय् स्थापित जुइगु नापं कन्हय् वनाः नं थःम्हं चाहाना यानाम्ह हे प्रधानमन्त्री यायेगु नापं थःपिनिगु स्वार्थ पूर्ति यायेफैगु हे तायेकाः उगु कथं भारतया डिजाइ नं खः धकाः नं मनूतय्सं धयाहःगु दु ।
एकीकृत माओवादी, कांग्रेस व एमाले स्वंगुलिं दलया प्रमुख नेतात भारत पक्षधर जूगुलिं हे भारतं आः वयाः थ्व स्वंगू दलया शीर्ष नेतातय्त मिलेयायेगु डिजाइन यानाच्वंगु दु धकाः छम्ह अन्तर्राष्ट्रिय विद्ं दावी यानादीगु दु ।
उकिं आःया अवस्थाय् स्वंगू हे दलया नेता भारतीय सत्तापक्ष जूगुलिं हे नेपालय् व हे स्वंगू दलया नेतातय् दथुइ ल्वापु जूथें जूसां आखिर भारतं हे मिले यायेमालीगु अवस्था वइ धकाः तकं टिप्पणी यानाहःगु दु ।
