निकासया नितिं सर्वपक्षीय गोलमेच सभा

यल (झीगु स्वनिगः)

मुलुकया राजनीतिक गतिरोधयात अन्त्य यानाः निकास बिइगु नितिं राजनीतिक दलतय्गु दथुइ सहमति ब्वलंकेगु नितिं धकाः नेकपा—माओवादीं म्हिगः शनिवाः यलया सानेपाय् च्वंगु अन्तर्राष्ट्रिय क्लबय् गोलमेच सभा यात । उगु गोलमेच सभाय् राष्ट्रिय राजनितिक अन्तक्र्रिया कार्यक्रम नां तयाः याःगु उगु ज्याझ्वलय् प्रमुख दलया शीर्ष नेतातनिसें थीथी राजनीतिक दलया नेतात, आदिवासी जनजाति नापं आन्दोलनरत पक्षया नेतातनिसें थीथी पार्टी दुने विचार समूह दयेकाः संघर्ष यानाः वयाच्वंपिं नेतातय्सं तकं ब्वति कयाः थःथःगु विचाः प्वंकादीगु खः ।

उगु ज्याझ्वलय् नेकपा—माओवादी नापं अप्वः यानाः चिचीधंगु दलया नेतातय्सं आःया अवस्थाय् गोलमेच सभापाखें हे मुलुकयात निकास बिइमाः धयादीगु खः । संघीय लोकतान्त्रिक राष्ट्रिय मञ्चया खगेन्द्र माखेम, संघीय सदभावना पार्टीया नेता, गणतान्त्रिक मधेसी मोर्चाया राजलाल यादव, मधेसी जनअधिकार फोरमया रामेश्वर कायष्ठ, नापं शरदसिंह भण्डारी लगायत थीथी दलया नेतातय्सं अथे धयादीगु खः । अथे गोलेमेच सभापाखें निकास बिइमाः धकाः जनजाति पुलांपिं सभासद्तय्गु ककसया दलबहादुर थ्यंमथ्यं ९ घौ तक जूगु उगु गोलमेच सभाया निचोड पिकयाः नेकपा—माओवादीया नायः मोहन बैद्य किरणं गोलमेचसभा, चुनाव, निर्वाचन व पुनःस्थापना न्ह्यागु हे जूसां न्हूगु सरकारया आवाज वःगु खँ न्ह्यथसें धयादिल, ‘काँग्रेस व एमाले सरकार चीकेमाः धयाच्वंगु दु तर वय्कःपिंके छुं नं कथंया निकास मदु, सत्तापक्षं सहमति मजुइकं चिलेगु जुइमखु धयाच्वंगु दु, थज्वःगु इलय् गोलमेच सभा हे उत्तम विकल्प खः ।’’ सहमति मजुल धाःसा सतकय् वनेगु धकाः अप्वः यानाः दलतय्सं धाःगु खँय् बः बियादिसें धयादिल ‘‘ यथास्थितिइ संविधान सभापाखें निकास वइमखु, राष्ट्रिय स्वाधीनता, जनतन्त्र व जनजीविकाया नितिं फुक्क दलत गोलमेच सभापाखें सहमतिइ यानाः संविधान सभायात पुनःस्थापना यायेफै ।’’ वय्कलं धयादिल ‘संसदीय निर्वाचन गुगु नं हालतय् याये फैमखु ।’ संविधानसभा विघटन जुइ धुंकाः ब्वलंगु राजनीतिक संकट समाधान यायेत राष्ट्रिय राजनीतिक अन्तरक्रिया ज्याझ्वः यानागु खँ न्ह्यथसें संसदिय निर्वाचन यात धाःसा ०६२÷६३ लिपा फुक्क उपलव्धीत समाप्त जुइ धयादिल । अथेहे उगु ज्याझ्वलय् एकीकृत माओवादीया नायः पुष्पकमल दाहाल प्रचण्डं संविधानसभा विघटन जूगुया कारण कांग्रेस व एमाले खः धकाः द्वपं बियादिसें जातीय पहिचानसहित संघीयताया पक्षय् उगु दलत वयेगुया विकल्प मदु धयादिल । प्रचण्डं संविधानसभा पुनःस्थापनाय् सहमति मजूगु अवस्थाय् सरकाया नेतृत्व कांग्रेसयात बिइगु जुइमखु धकाः स्पष्ट यानादिल ।

अथे हे कांग्रेसया नेता रामचन्द्र पौडेलं सत्तारुढ दलपाखें संघीयताया नामय् गठबन्धन यानाः राजनीतिक बेइमानी यात धकाः द्वपं बियादिल । एमालेया नायः झलनाथ खनालं आःया अवस्थाय् दलतय्गु दथुइ अविश्वासया वातावरण जुयाः वनाच्वंगुलिं न्हापां विश्वासया वातावरण दयेकेमाः धयादिल ।

नेकपा (माओवादी)या संयोजक मातृका यादवं सहमति सहकार्य धाःगु अग्रगामी चेतनायात मत्थर यायेगु नितिं जक जुयाच्वंगु खः धयादिसें धात्थें परिवर्तन यायेगु खःसा आन्दोलन हे यायेमाः धकाः धयादिल । उगु गोलमेच सभाय् मालेया सीपी मैनाली, थीथी दलया नेतात सुर्य बहादुर थापा, पशुपति शम्शेर जबरा, एमालेया न्वकु अशोक राई, नागरिक समाजया सुन्दरमणि दिक्षित, दमननाथ ढंगाना लगायतयापिं उपस्थिति जुयादीगु खः ।