‘सहमतिया नितिं हे गोलमेच सभा’

गोलमेच सभां नं निकास मवल धाःसा आन्दोलनं बिइ : किरण

येँ (झीगु स्वनिगः)

नेकपा—माओवादीया नायः मोहन बैद्य किरणं आःया अवस्थाय् मुलुकया राजनीतिक अन्यौलतायात निकास बिइगु नितिं छगू जक माध्यम गोलमेच सभा खः धकाः दावी यानादीगु दु ।
म्हिगः सोमवाः संयुक्त राष्ट्रिय जनसंघर्ष समिति नेवाः राज्य समितिं सोमवाः ‘नेपाःया वर्तमान राजनीतिक संकट व अग्रगामी राजनैतिक निकास’ विषययात कयाः तःजिक याःगु गोष्ठीइ नेता किरणं अथे धयादीगु खः ।
वय्कलं राजनीतिक सहमति दयेकेगु नितिं हे गोलमेच सभा अनिवार्य जूगु दावी यानादिसें गोलमेच सभां आः मुुलुकयात गुगु कथं निकास बिइगु धकाः निर्णय यायेगु ज्या जुइ धकाः धयादीगु दु ।
आः हे संविधानसभा पुनस्र्थापना यायेगु, चुनाव यायेगु बाय् आयोगया माध्यमं संविधान दयेकेगु धकाः धायेगु पाय्छि मजू धयादिसें व बाहेक मेमेगु नं विकल्प वयेफु धकाः नं नेता किरणं धयादिल । वय्कलं आः वयाच्वंगु खँ बाहेक नं मेमेगु विकल्प नं वयेफु धयादिसें निकासया नितिं दक्ले न्हापां गोलमेच सभा यायेत तयार जुइमाः धकाः धयादिल ।
विघटन जूगु संविधानसभाय् दुथ्याःगु दलत, आःया अवस्थाय् आन्दोलनरत आदिवासी जनजाति, मधेसी, मिसापिंनिसें राज्यं बहिस्करणय् लाकातःगु समुदाय, संघीयता पक्षधर नापं अग्रगामी पक्षधरतय्त दुथ्याकाः गोलमेच सभा यायेमाः धकाः धयादिल ।
यदि गोलमेच सभाय् नं निकास बिइत सहमति याये मफत धाःसा अन्ततः आन्दोलनं जक हे अग्रगामी संविधान वइ धकाः नं नेकपा—माओवादीया नायः मोहन बैद्य किरणं धयादिल ।
आःया संघर्षया एजेण्डा संविधान व जनवाद जक मखु व नाप नाप) राष्ट्रिय स्वाधिनता नं मूल एजेण्डा जुइ धकाः नं वय्कलं स्पष्ट यानादिल ।
उगु ज्याझ्वलय् नेपाली कांग्रेसया नेता डा. मिनेन्द्र रिजालं राजनीतिक गतिरोध निकासया नितिं न्हापां आःया प्रधानमन्त्री डा. बाबुराम भट्टराई नं राजीनामा बिइमाः धयादीगु दु । वय्कलं अनं लिपा सहमतिया राष्ट्रिय सरकार दयेकाः संविधान÷संसदया चुनावय् वनेमाः धकाः बः बियादीगु खः । अथे हे एमालेया नेता युवराज ज्ञवालीं नं आःया अवस्थाय् वर्तमान कामचलाउ सरकार हे निकासया नितिं पंगः जुयाच्वंगु खः धकाः धयादिल । कांग्रेस व एमालेया निम्ह हे नेतातय्सं न्हूगु सरकार दयेके धुंकाः संविधानसभाया चुनाव यायेगु ला कि संसदया चुनाव यायेगु धैगु बारे स्पष्ट खँ तयामदी ।
ज्याझ्वलय् नेकपा (एकीकृत)या नेता सिताराम तामाङं मुलुकयात निकास बिइगु नितिं संविधानसभाया चुनावय् हे वनेमाः धकाः बः बियादीगु दु । वय्कलं जनताया संविधान निर्माणया नितिं संविधानसभापाखें हे न्हूगु संविधान हयेमाः धयादिल । अथे हे गोपाल सिवाकोटी चिन्तनं संविधानसभाया चुनाव वैधानिक जुइमखु धकाः धयादिल । आःया अवस्थाय् निकासया नितिं सर्वपक्षीय गोलमेच सम्मेलन यायेमाः धकाः धयादिल ।
ज्याझ्वः संयुक्त राष्ट्रिय जनसंघर्ष समिति नेवाः राज्य समितिया नायः पवनमान श्रेष्ठया सभापतित्वय् छ्याञ्जे देवेन्द्र श्रेष्ठं संचालन यानादीगु खः ।