तःजिक क्वचाल नेवाः अर्केष्ट्रा

नेपाः देय्या आदिवासी नेवाःतय्गु मौलिक बाजं संरक्षण याना थुकिया प्रचार प्रसार यायेगु तातुनां सनिवाः स्वयम्भुइ सच्छि व ७५म्हेसिन छथाय् च्वना थीथी नीन्याथी बाजं थाना नेवाः अर्केष्ट्रा न्ह्यब्वल ।

लिधंसा पुचः, थँहितिया ग्वसालय् न्ह्यब्वःगु नेवाः अर्केष्ट्राय् च्यादँ दुपिं मस्त निसें न्हेन्यादँ दुपिं ज्याथःतय्त तकं दुथ्याकाः थीथी नीन्याथी बाजं छथाय् हे तया थानाक्यंगु खः । वरिष्ठ वाद्यवादक न्हुछे बहादुर डंगोलं कम्पोज यानादीगु नेवाः अर्केष्ट्राय् थीथी नीन्यागू खलः पुचः, संघसंस्था व कलेजयात दुथ्याकूगु खः । मिजंत तपाःलँ सुरुवा व मिस्त जांगासुरुवा व हाकु पतासिइ खनेदुगु नेवाः अर्केष्ट्राय् तग्वः धिमे नाप धुन्या हीका ज्याझ्वः न्ह्याकूगु खः ।

भगवान बुद्धया पाली संगीतया धुनं माध्यमं भगवान बुद्धया स्तुती यायेगु मनसायं नेवाः अर्केष्ट्रा यानागु धयादिसें वरिष्ठ बाद्यगुरुं थम्हं च्यादँनिसें बाजं थायेगु सयेका मदिक्क निरन्तरता बिया वयाच्वनागु व आ न्हूगु पुस्ता थुकियात अनुसरण याना झी नेवाःतय्गु मौलिक बाजंयात आधुनिकीकरण याना निरन्तरता बिइमाःगु धयादिल ।

बाँसुरीया धुनय् तग्वः धिमे, भुस्या, घौ थाना धुन्या हीका सुरु याःगु नेवाः अर्केष्ट्राय् चिग्वः धिमे, मादल, खिं, क्वंचाखिं, धाः, नाय्खिं, किब्वर्ड, भ्वाइलेन, ताः, छुस्या नापं पँया बासुरी, सिंया बाँसुरी व प्लाष्टिकया बाँसुरी पालंपाः थाना दकले लिपा छथूं छगु हे इलय् थाःगु खः ।
थुगु अर्केष्ट्राया कम्पोज वरिष्ट वाद्यवादक न्हूछेबहादुर डंगोलं यानादीगु खः ।

तिवः नांया छगू मिस्तय्गु सामाजिक संस्थायात ग्वाहालि यायेगु कथं न्ह्याकूगु थुगु नेवाः अर्केष्ट्रा नेवाःतय्गु मौलिक बाजंयात आधुनिकीकरण याना मौलीकतायात मस्यंकूसें न्ह्यब्वःगुया छगू दसू जुयाब्यूगु दु ।

ज्याझ्वलय् वरिष्ट वाद्यवादक न्हुछेबहादुर डंगोलयात लिधंसा पुचःया नायः सरोज महर्जनं दोसल्ला न्यय्का द्वहलपा देछागु खः । उगु हे झ्वलय् थुगु अर्केष्ट्राय् ब्वति काःगु थीथी त्वाः व ब्वति काःपिन्त वरिष्ठ वाद्यवादक डगोलं सुभाय् पौ लःल्हानादीगु खः ।

News Location:

Related Stories

बृहत नेवाः अर्केष्ट्रा स्वयम्भुइ जुइगु

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन