दिवंगत जूपिनिगु लुमन्तिइ पिकाइगु सायाः

थौं सापारु, श्रावण कृष्ण प्रतिपदाया दिनस हनिगु थुगु नखः स्वनिगः नाप देय्या थीथी थासय् तःजिक्क हनाच्वंगु । पद्मपुराणयात आधार नालेगु खःसा थुगु नखः थ्यंमथ्यं नींप्यसः दँ निसें हनावःगु खनेदु । ऐतिहासिक प्रमाण कथं जुजु प्रताप मल्लं थः काय् मदया तसक्कं दुःख तायेकाच्वंम्ह लानीया चित्त बुझे यायेत थ्व जात्रा न्ह्याकुगु खः ।

थुगु दिनस छेँय् काय् मस्त सीसा जोगीया रुप व म्ह्याये मस्त सीसा साःया रुप धारण याका फूपिंसं बाजागाजानापं देय् चाहिलेगु परम्परा दु । सुरुसुरुइ प्रत्येक छेँय् नं छम्हछम्ह सायात समाः याका देय् चाहीकीगु परम्परा दुगु खःसा थौं कन्हय् साःया ख्वापाः जक पुइका मनू हे चाहिकेगु चल दु । यमलोकया लुखा दछियंकं हे बन्द जुइ । सीपिनि आत्मा लुखा पिने हे च्वनाच्वनी । नक्कली सा, जोगी व मेमेगु रुप धारण याका देय् चाःहिकूसा यमलोकया लुखा न चालिइ व सीपिनिगु आत्मायात न मुक्ति दइगु खँ गरुड पुराणय् न्ह्यःथनातःगु दु । थुगु नखः हिन्दुतयेगु नखः जूगुलिं न सादान महत्वपूर्ण संस्कृति खः । पौराणिक कथं खुसी वैतरणी साःया न्हिपं ज्वंना जक छिइ फइगु धइगु जनविश्वास न दु । वहे कथं न थौं सादान यायेगु परम्परा न्ह्यानाच्वंगु खनेदु ।

जुजु प्रताप मल्लया पालय् स्वनिगलय् बिफर ल्वय्या महामारी ब्वलन । थुगु हे ल्वचं जुजु प्रताप मल्लया काय् मन्त । काय् मदया जुजु प्रताप मल्लया लानीं पुत्रशोकय् लाना तच्वयेक्क दुःख तायेकल । वय्कयात हेकेत न्ह्याथे याना न मज्यूगुलिं जुजुं छम्ह बुद्धिमान मन्त्रीयात थुगु समस्या ज्यंकेगु लँपु मालेत उजं बिल । वहे उजं कथं मन्त्रीं महारानीयात न्हिइके फूम्हेसित सिरपा बिइगु धका घोषणा न यात । बुद्धिमान मन्त्रीं सापारु न्हका महारानीया दुःखयात शान्तिइ हिलाब्यूगु धैगु इतिहास दु । विशेषयाना स्वनिगःया येँय् यल व ख्वपय् थुगु नखः तजिक्क हनेगु या । नापनाप येँय्या किपुलिइ, थानकोट नापंया नेवाः बस्ती सापारु हनाच्वंगु दु ।

सापारु येँ, यल, किपुलिइ, थानकोटय् मनूयात साःया ख्वाःपाः दुगु मुकुट पुइका देय् चाःहिकेगु याइ । तर ख्वपय् धाःसा भचा पाः । नापं सायाः स्वयेगु ख्वपय् न्ह्याइपु धाइ । छाय् धाःसा ख्वपय् सीगु छेँ नं मदुपिनिगु लुमन्तिइ तायामचा दयेका चाःहिकी । थथे तायामचा दयेका चाःहिकीबले फुपिन्सं तायामचाया न्ह्यःने बाजं थाका घिन्ताकिसि म्हितकी । थथे घिन्ताकिसि म्हितीबले ब्यंग्य यायेगु चलन दु ।

खय्तला सापारु धैगु ब्यंग्य यायेगु जात्रा कथं नं कायेगु यानातःगु दु । थुगु दिं निसें छवाःतक थीथी कथं ब्यंग्य याना ध्याचू नकूसां सुना नं छुं धाये मदइगु धैगु मान्यता दु ।

किपा:- अनिक शाक्य

More Stories Like this